روحت الفرح

كان يوم 28/1 اللى فات

فرح منال ...

زميلتى فى الجامعة ...

كان الكل بيقول علينا .. روحين فى إزازة

كنا دايما سوا ...

بجد .. شعورى يومها مختلف تماما عن اى يوم تانى

خلينى الاول اتكلم على اللى حصل يومها

خلصت شغل فى الورشة الساعة 7 و روحت البيت على ما غيرت و نضفت كانت بقت تمانية كانت ماما جهزت و خرجنا

فى قاعة اسمها صهللة .. كذا دور و كل دور فيه قاعة بإسم شكل

كل ماندخل انا و ماما دور ألاقى فيه عروسة غير منال خالص .. دورت فى التلات ادوار مالقيتشى
قلت هو الفرح اتأجل ولا ايه ؟

نزلت انا و ماما تانى و قلت اتصل بواحدة من زمايلنا اسمها نجوى ..
قلتلها هى فين منال ..؟ قاتلى مش هاجى و اعتذرلها بدالى و كده ..
قلت هو انا مش هالاقيها يعنى ولا ايه ..؟ مش معقول آجى لحد هنا و مالاقيهاش
طلعت تانى و سبت ماما تحت ... بالصدفة قابلت واحدة اسمها مروة كانت معرفة عن طريق منال .. قلتلها فين الفرح قالت فى التالت .. طلعت .. لقيت واحدة شبه منال قلت أكيد هى ...
نزلت جيبت ماما و بعدين أول ما طلعنا دخلت على منال أسلم عليهاو انا لسه شاكك هى ولا لأ ... و طلعت هى

رحبت بيا اوى و الفرحة كانت ها تنط من عينيها لماشافتنى ... سلمت عليها و على العريس و ماماكالعادة سلمت عليها و باستها - مع انها ما تعرفهاش - و بعدين رجعت انا و ماما قعدنا على ترابيزة
انا دلوقتى جوا فرح ماعرفشى فيه حد أبدا ... وكمان مروة ما شفتهاش تانى

يعنى فرح لا اعرف فيه حد ولا حد يعرفنى ..
بس العجيبة و الغريبة - و الله العظيم حصل - لقيت تقريبا ييجى 6 بنات ورا بعض كل واحدة تيجى تقوللى ازيك يا احمد و الف مبروك و بتاع .. و انا و الله العظيم مااعرف ولا واحدة منهم
عرفت من واحدة منهم ان منال بتتكلم عليا كتير ...
اتعرفت عليهم بعد كده .. فاطمة .. و اميرة .. و هبة .. و تقريبا فاطمة تانى ... و الباقيين مش فاكرهم

حضرت افراح كتير قبل كده لقرايبى البنات و الولاد كمان
و فى كل الافراح دى كنت باحس انى على الهامش و مش فى الصورة خالص
... ماليش أى دور و ماحدش مهتم بيا.
إلا الفرح دا ... حسيت إن الكل متهم بيا .. من غير مبالغة و الله

مامتها جت لحد عندى هى و مامة العريس و قالولى الف مبروك و عقبالك و كده ... واحدة من البنات راحت نادت على الاتنين و جابتهم يسلموا عليا
و باباها لما سلمت عليه قاللى انت احمد حمزة زميلها ؟
انا كنت فرحان اوى .. اوى اوى اوى
و الله العظيم كنت فرحان بيها جدا ..

فرحتنى و حسستنى أد إيه انا حلو .. و فى حد فعلا فاكرنى و بيحبنى من غير أى غرض ...
انا كمان بحبها جداااا و الله العظيم وباتمنى ليها كللل خير
لأنها فعلا تستاهل كل خير
سلمت عليها و ماما قالتلى تعالى نقعد بقى شوية
قلتلها اعدى انتى .. انا هاقف شوية ...
فضلت واقف وهى من بعيد بين اللحظة و التانية تبص عليا و تضحك اوىىىىىى
و قعدت تشاورلى و تقوللى " تعالى ... تعالى " ..و انا مكسوف جدا طبعا

ساعتها افتكرت اد ايه احنا كنا قريبين من بعضنا اوى ...
افتكرت كل اللحظات

أول مرة قابلتها ... يوم 18/9/2004 .. السبت .. كانت اول سنة ليها فى الجامعة ... فى اليوم دا كانت لابسة بلوزة بيضة و جيبة زرقا ... و كانت معاها واحدة زميلتها اسمها اميرة جمال .. و كانت لابسة نفس الالوان بردو ..
انا افتكرت الاتنين اخوات او حتى قرايب لكن فكرتى طلعت غلط .. كانوا مجرد زمايل ..
انا فى البداية كنت ميال لأميرة أكتر و كنت واخد عليها أكتر .. و باستظرفها أكتر ..
دلوقتى بيتهيألى لو شفتها فى الجامعة مش هاتعرفنى ولا هاعرفها

افتكرت كمان أيام ماكنا بنتقابل فى الجنينة بتاعة كلية آداب و نفطر سوا .. أنا أبقى مصرّ نفطر همبورجر و شاورمة و هى خايفة على فلوسى و تقوللى ماتخليها طعمية و جبنه .. انت غاوى مصاريف ..؟ ولا معاك قرشين عايز تخلصهم ؟

افتكرت الشلة اللى اتعرفنا عليها فى سنة أول .. شلة تربية رياضية ..
محمد و احمد و ايمن و عمرو .. و افتكرت كمان لما كلمتها عليهم و قلتلها تقطع علاقتها بيهم لانى شوفت أيمن بيتكلم على " جسم " واحدة من البنات زمايلنا أول ما سابتنا مع انه كان كويس جدا معاها

فاكر كمان الشلة اللى اتعرفنا عليها .. نجوى ابراهيم .. عبير عباس .. عبير مغاورى .. هند .. أسماء شبل .. سمر مرسى .. مروة .. عبد الله .. حمادة .. عمرو ..
فاكر يوم ماكنت غايب و جابوا كاميرا و اتصوروا و شوفتها متصورة مع عبد الله فى صورة لوحدهم .. و زعقتلها و قلتلها ازاى .. ماينفعشى .. مايصحش .. و هى أمنت على كل كلامى ..
فاكر جمعية الرسالة للأعمال الخيرية .. اللى عرفت منال عليها و اشتركت معايا فيها و .. و فاكر الرحلتين اللى زرنا فيهم مركز تعليم مجانى للأطفال الأيتام .. مابين 4-6 سنين ..
و لما كنا بنغنى معاهم الاغانى و نوزع عليهم الحلويات و نصاحبهم " و نرجع مبسوطييييييييين اوى باللى عملناه و اننا فرحناهم ..
فاكر يوم ما ركبت انا و هى ميكروباص من عند الصاغة .. و كنا رايحين الجامعة ..
الميكروباص كلن كله حريم ماعدا أنا الراجل الوحيد و كنت قاعد جنب منال . لما واحد راجل جه يركب - كان شيخ - قال إيه دا ..؟ هو كله كريم ؟ ..
رحت رافع إيدى و قايلله انا راجل أهو ياعم .. و ضحكنا أوىىى
فاكر يوم ما أكلتها كشرى لأول مرة عند كشرى التحرير . . و استعجبت لما لقيتها بتحب الشطة جدااااا ..
فاكر أيام ماكنا بنخرج ناكل أيس كريم من عند توبنج .. و هى تقوللى " هاتلى معالق بلاستيك كتير علشان أكمل جهازى " .. طبعا تقصد المعالق البلاستيك بتاعة الايس كريم ..
فاكر لما كانت تقى زعلانة او متضايقة تقوللى " أحمد .. ماتقوللى نكتة " .. أقوللها .. طب إضحكى الأول .. تقوم تضحك أوىىىىى .. و ما أقولشى نكتة .. و مع ذلك تضحك أوىىى
فاكر العيد الصغير اللى فات .. لما اتصلت بيها أقوللها كل سنة و انتى طيبة .. قالتلى فى مفاجئة .. لما أقابلك هاقوللك عليها . و أتارى المفاجئة إنها إتشبكت لمحمد فرحات .. جوزها دلوقتى .. يومها .. كانت جايبالى معاها فى شنطتها ييجى نص طن شيكولاته و بونبونى و أنا خلصت عليهم كلهم . . و يومها كمان طلبت منى هدية شبكتها و جبتلها هاند فرى للموبايل
فاكر يوم 25/1/2005 .. لما اتقابلنا فى الجامعة فى اجازة نص السنة .. و يومها اتخانقت - مع انى مش بتاع خناق خالص - مع واحد غتت قاللى - ماتسيب واحدة - .. هى كانت جاية مع واحدة زميلتها ..
فاكر أيام الحد و الاربع ... اللى كنت باشوفها فيهم دايما ..
فاكر يوم ما عرفتنى لأول مرة على خطيبها الأولانى اللى سابته ... كان إسمه محمد فؤاد .. كنا ماشيين و بعدين فتحت كشكولها .. لقيت جواه صورة محمد فؤاد بتاع الحب الحقيقى .. قلتلها انتى بتحبى محمد فؤاد ..؟ قالتلى بموووت فيه .. دا هو الحب الوحيد اللى فى حياتى .. أنا صدقتها .. و بعدين قالتلى انت عارف انا بحبه ليه ..؟ علشان على إسم خطيبى .. و بعدين ورتنى صورة خطيبها ..
فاكر يوم ما قلنا ها نطلع المكتبة نتثقف شوية .. و كان دخول المكتبة بالكارنيهات .. و انا كنت ما دفعتش المصاريف و مارضيوش يدخلونى و دخلوها هى .. راحت راجعة تاني .. و قالتلى .. يا ندخل سوا يا نخرج سوا ..
فاكر يوم ما ركبنا الميكروباص و احنا راجعين و كان زحمة اوى و كبير اوى .. هى كانت واقفة قدام و انا كنت واقف ورا .. و انا دفعتلها يومها و هى دفعتلى ..
فاكر أجمل أفلام شفتها فى حياتى .. زكى شان و أبو على و واحد من الناس ..
علشان شفتها معاها فى السينما .. صحيح ماحدش عرف عن موضوع السينما دا حاجة . و صحيح كنا لوحدنا .. لكن بجد كنا بنحترم بعض جدا .. جدا جدا جدا
فاكر لما نسيت معاها مفتاح الصيدلية البيطرية أيام ماكنت شغال فيها .. و روحت الصيدلية و جيت أفتح مالقيتش المفاتيح فى جيبى ,.. لولا هى اتصلت بيا و قالتلى مفاتيحك معايا .. و اتقابلنا و خدت منها المفاتيح ...
فاكر لما كنا بناكل آيس كريم و واد صغير شحات بيشحت منى و بيقوللى " يارب تتجوزوا " .. و انا أقولله مخطوبة يابنى .. يقوم ابن اللذين يسهينى و ينتش حتة من بسكوتة الايس كريم
و فاكر اخر يوم قابلتها فيه قبل يوم فرح .. كان يوم الخميس اللى قبله .. لما شربنا عصير قصب .. و احنا بنشرب قالتلى انها كانت خارجة قريب مع محمد -جوزها -و قاللها تعالى نشرب عصير قصب و هى مش رضيت
قلتلها دا كده يبقى شرف ليا إنك ترضى تشربى عصير معايا انا
و أكيد هافضل فاكر الفرح ... اليوم الجميل دا اللى حسستنى فيه فعلا إنى مهم عندها ..

تخيلى كانت بترقص سلو و عمالة تبصلى .. زى ما يكون بتقوللى " انا فرحانة جدا إنك جيتلى النهاردة ..
و أكيد اللى زود فرحتها إنى انا زميلها الولد جيت فى حين إن زمايلها البنات ماجوش
ماقعدتش كتير .. و لما قمت علشان أمشى . كان طبيعى انى اسلم عليها .. شدت على ايدى اوى اوى اوى .. و قالتلى .. و النبى تخليك يا احمد . قلتلها امى ها تنام .. ضحكت و قالتلى خلاص ..
و راحت معلية صوتها أوى - زى ما يكون بتسمع ماما - و قالت بصوت عالى أوىىى .." عقباااااااالك " ..
قلتلها ربنا يخليكى . و سبتها و مشيت ...
بس مشيت و انا فرحان اوى .. بجد إنسانة كويسة اوى .. و محترمة اوى .. و طيبة اوى .. فيها كل الصفات الحلوة و الله ..

يااااااااااااااااااااااارب يهنيها و يسعدها .. و يارب يكون محمد فرحات دا يستحقها فعلا ..

يااااااااااااااااااااااااارب