وحيد

آه يا مدينتى

باهرب من الناس كلها و باجيلك انتى

سهران وحيد ..

حيران .. شريد ..

سرحان بعيد

مع ناس كتيرة عرفتها ..ما عرفتهاش

و عرفت فى الآخر نهاية قصتى ..

نفس المكان ..

نفس الشوارع و الحيطان..

لكن لوحدى ..

عاشق صحيح ..

لكن لمين ؟

الذكريات مالية القلوب ..

و الأغنيات مالية الدروب..

فوق كل شبر مشيت وحسيت بالأمان ..

لكن لا يمكن يوم تعود أحلام زمان ..

زهقان من الأحلام لوحدى ..

من أد إيه أنا و الملاك كنا هنا ؟

من كام سنة ؟

فاتت سنين ..

و رجعت تانى اعيش وحيد

جوا المدينة

ديوان جديد

ديوان جديد لقيته للشاعر طلال فيصل بعنوان .. " الملائكة لا تشاهد الأفلام الإباحية " .. عجبنى جدا و قلت تشاركونى القراءة ..

يارب يعجبكم ..

و لو عايز تقراه .. إضغط هنــــــا

فاكرة ؟

فاكرة أول مرة شوفتك ؟

كنتى لابسه بلوزة بمبى و جيبة بيضا ..

قلت أيامى اللى جاية ها تبقى بيضا ..

شفت جوا عنيكى احلامى اللى ماتت ..

بس دايما كنت ساكت ..

كنتى بتقولى " أخويا " و ابقى راضى ..

كنتى بتقولى " بحب فلان " و اقول دا عادى ..

اصل القضية ..

انى ابقى تملى جنبك ..

وابقى سامع نبض قلبك ..

و اما افكر يوم اقرب منك ..

اسألك..اخباره ايه

كنت باتصرف و افتّح موضوعات ..

عارفة ليه ؟

لما باتكلم معاكى باحس ان الحزن مات ..

حتى لو ها نتكلم عليه ..

ربنا يخليكى ليه ..

كل أملى إنى اكون دايما أخوكى ..

و ابقى جنبك ..

مش مهم تكونى ليا ..

مش مهم تحسى بيا ..

المهم تكونى دايما عارفة انى ..

لجل خاطرك انزل البحر الغويط ..

لجل خاطرك ممكن اشرب المحيط ..

لجل يبقى الفرح ساكن جوا قلبك ..

ممكن اعمل أى شىء ..

ممكن أخسر أى شىء ..

أى شىء..

ورقة قديمة

زمان .. من ييجى خمس سنين كده ... كنت لسه فى ثانوى .. كنت لسه باتعلم أعمل مواقع انا و اصحابى .. مواقع مجانية .. قلنا ها نشترك كلنا " انا و احمد مجدى و احمد النحال " فى عمل موقع دينى .. و كنا ها نسميه موقع الدعوة .. مش عارف إيه اللى حصل أيامها خلى الموضوع يتلغى .. يمكن الإهمال أو الكسل .. الله أعلم ..المهم إنهم أيامها كلفونى أكتب كلمة الموقع .. الكلمة اللى ها تتحط فى صفحة البداية يعنى ..قعدت تلاتيام أجهز فيها .. و قعدت اكتب مسودات كتييييييييير اوى .. اوى .. النهاردة بالصدفة لقيت فوق الدولاب مسودة من المسودات دى ... فكرتنى بأيام جميلة فاتت و مش هاترجع تانى ..فكرت أعرض عليكم الكلمة اللى كنت كاتبها .. هى أكيد فى صورتها النهائية ماكانتشى كده .. أنا ناقل من المسودة .. بس يارب تكون كويسة كده و تعجبكم ..

--------------------------------------------

اصدقائى ..

إخوانى ...

يا كل من يسمع .. و يعقل..

إسمعونى ..

إقرءوا قلبى ..

إفهمونى...

نداء القبر عال ..

و نداء لذات الدنيا خفيض..

ولقد جئنا نلبى نداء القبر .

و ندعو إلى تلبيته..

جئنا..

نزرع و ننزع..

نزرع الامل ...

و ننزع الالم..

نبشر و نيسر ..

نجمع ولا نفرق ..

نهدى - بإذن الله - ولا نضل..

نعقد عليكم الآمال يا شباب فى حمل الأمانة ..

تلك الأمانة التى أبت الأرض و الجبال أن يحملنها و حملها الإنسان

تلك الأمانة التى تحتاج إلى جيل ايمانه راسخ لا يتزعزع ..

و نشاطه متقد لا يتوقف ..

و ثقته فى الله لا تذبل او تضعف..

اخوانى ...

إنكم جيل ينتظره العالم و الدنيا قاطبة ..

جيل .. اطاعوا الله و رسوله .. فأحبهم الله و رسوله

جيل ... يمتاز بالخلق الفاضل ...

و الطهر الكامل ...

و العفة و النقاء..

اخوانى .. إن الإسلام- انتم - هو حلم الإنسانية الخالد ..

جاء ليحرر الناس من عبادة العباد إلى عبادة رب العباد..

تلك العبادة التى تستقيم فيها الأقوال و الأفعال بوازع من قلب و ضمير..

و لا تستثنى من ذلك النيات ايضا..

إخوانى .. إن الشباب قوة ..

و القوة هى أن تكون لك فى الحياة كلمة تسير فى ظلها و تحت رايتها..

و لتكن كلمتك اخى العزيز ..

" قل إن صلاتى و نسكى ومحياى و مماتى لله رب العالمين "

آلاء حبيبتى

بحبها اوى .. اوى

بحب نظراتها اللى بتخلينى أعيش فى عالم تانى ..

عينيها اللى كلها حب .. و طيبة .. و براءة ...

قريت لأشرف توفيق فى بلوجه أخف دم شعر عجبنى فيه كلام .. حسيته مكتوب علشانها

بيقول :

عارفة ..

مع إن عنيكى ماهيش خضرا .

الدنيا فى ننى عنيكى تملى تبان خضرة

و الله هى فعلا كده .. آلاء حبيبتى أنا

و الله لما بيعدى عليا يوم واحد .. واحد بس .. من غير ماشوفها ..

بيبقى يوم كئيب و رخم و بيعدى تقيييل اوى

لما بتضحكلى باحس بضحكة الدنيا كلها من حواليا ..

باحس بضحكة الحيطان و الباب و الشباك و السرير و الدولاب و الغسالة و التلاجة و البوتاجاز ..

كل حاجة بتضحك علشان آلاء ضحكت ..

جمالها جمال مالوش مثيل .. مافيش أجمل من كده ..

و مافيش دم اخف من كده ..

باتمنى إنى أفضل طول عمرى معاها ..

أفضل جنبها أسمع صوت ضحكتها و أشوف حركاتها الشقية و اعمللها كل اللى هى عايزاه

عايزها تفضل دايما تضحك و تملى الدنيا فرحة و ضحك حواليا

آلاء بقت حاجة أساسية فى حياتى زيها زى الشغل و الجامعة و كمان المية و الهوا

ماقدرشى اعيش من غير ما اشوفها .. و تبقى معايا

ربنا يخليها يارب .. يااااااااااااارب

-------------------------

على فكرة آلاء دى بيبى لسه 9 شهور .. بس

متى يعود ؟

شعور جديد ذلك الذى شعرت به

شعور يختلف

هل فكرت يوما أن تتجسد أحلامك أمامك فى صورة مادية ..؟

هل حلمت يوماَ بهذا ..؟

هى أيضا مثلك لم تكن تفكر .. أو تحلم

إلى أن جاء ذلك اليوم

يوم كباقى الأيام .. تتلاقى فيه الصديقات فيتجولن فى طرقات المدينة

منهم من تبتاع .. تتنزه .. تبحث عن بضاعة ما .. و كانت هى من بينهن ..

جمعتهن الأحاديث و القصص .. و الأخبار المتناثرة عن فلان و فلانة ..

ثم أخذتهن أقدامهن نحوه ..

فى حانته الصغيرة .. التى يبيع فيها الأحذيه

هو أيضا لم يكن يفكر أو يحلم أن تتجسد أحلامه يوما... تماما مثلها ..

كانت لحظة من اللحظات

إلا أنها لم تكن ككل اللحظات ..

للوهلة الأولى .. و مع النظرة الأولى و الكلمة الأولى ..

أسرها و أسرته .. جذبها و جذبته ..

هناك .. فى تلك الحانة .. ولدت قصة جديدة ..

بين اثنين ...

سمر .. و منتصر ..

كم تمنت مثله .. و كم تمنى مثلها ..

هو أيضا يبحث عن الحب الحقيقى منذ زمن بعيد .. بعيد ..

يتمنى أن يجده .. و ها هو ذا بين يديه ..

و كما بحث هو .. بحثت هى ...

و ها هى تجد ضالتها فيه ..

تجد فيه الرجولة .. الحنان .. الطيبة .. الأمل ..

تجد فيه الحب ..

تلاقت قلوبهما من قبل أن تتلاقى عيونهما ..

و مابين القلبين دار حوار طويل ..

لم تكن لحظة ككل اللحظات .. فقد خلفت وراءها آلام و عذابات لا تنتهى

و ياليتها تنتهى ..

صارحها .. و صارحته ..

ضاق صدره بالكتمان .. و هو الذى تعود أن تهواه الجميلات ..

هو الذى لم تأسره أنثى .. و لم يقربه الحب من إحداهن من قبل ..

هاهو الحب يعلن سطوته و سيطرته عليه و على الجميع

و هاهو حبه يذيقه العذاب و المرارة ..

لكم كانت صدمتها و ألمها حين أخبرها أنه قرر الإنسحاب ..

يتحجج بصعوبة الظروف و ضيق ذات اليد ..

لم تفهم هى لماذا يصر على جلد ذاته ..

أهى المازوخية اللعينة ..؟ أم هو من هواة قراءة روايات المآسى .؟

أأراد تطبيقها واقعيا على نفسه ؟

لم تفهم لماذا لم يحاول .. لماذا لم يعط لنفسه الفرصة كى يحارب العالم كله من أجلها ..

ألا يعلم هو أنها تذوب فيه عشقا و هياما ..؟

ألا يعلم أنها ستنتظره و إن طال الإنتظار ..؟

ألا يعلم أنها ترى فيه أحلاما طالما رأتها بعيدة المنال ؟

لماذا يعذبها..؟

و هو الذى بادلته حبا بحب ..

دمعت عيناها حتى جفت الدموع ..

و ستظل تدمع إلى أن يعود ...

فمتى يعود ؟

ايه الراجل دا ؟

ايوة هو

حسام حسن لاعيب الكورة

شخصيته بتشدنى اوى

ماعرفهوش من قريب

لكن انا هاتكلم عن حاجة واحدة

عن قوته .. صموده .. اصراره اللى ماشفتش زيه

بصوا فى صورته كده و هاتعرفوا انا أقصد إيه

ملامحه .. كلها تحدى

جوز خالتى مواليد شهر اكتوبر سنة 1966

جوز خالتى - عم صلاح - جد دلوقتى

عنده حفيدة أمورة إسمها مها .. 6 شهور

حسام حسن أكبر من جوز خالتى بشهرين

حسام حسن مواليد شهر اغسطس سنة 1966

يعنى اللى قده جد

و مع ذلك بيلعب و بيجيب اجوان

مش علشان هو لعيب ..؟

من امتى كان حسام حسن سريع

من امتى كان جسمه قوى

انا لما باشوف ماتش دلوقتى لحسام حسن .. مش باركز على لعبه .. لعب الكورة ازاى و جاب جون ولا لأ

لكن باركز عليه و هو بيجرى

و هو بيتحرك

حركته زى حركة الشباب اللى من سن أولاده

قادر يحافظ على لياقته و نشاطه ..

مش علشان هو عايز فلوس .. حسام حسن من اغنى اللاعيبه فى مصر و عنده مشاريع كتيرة ناجحة

لكن علشان هو عايز كده .. عايز يفضل طول عمره شباب على طول

اتأثرت كتير اوى لما جاب جون فى كأس الامم الاقريقية الاخيرة

حسيت انه انتصر

على كل اللى هاجموه و قالوا عليه عجز

ياااارب يفضل يلعب لحد خمسين سنة

و انا متأكد انى هافضل احبه و اشجعه

حسام حسن بيتحدى الزمن

و بيتحدى الناس

و لحد دلوقتى .... كسبان التحدى و متفوق

روحت الفرح

كان يوم 28/1 اللى فات

فرح منال ...

زميلتى فى الجامعة ...

كان الكل بيقول علينا .. روحين فى إزازة

كنا دايما سوا ...

بجد .. شعورى يومها مختلف تماما عن اى يوم تانى

خلينى الاول اتكلم على اللى حصل يومها

خلصت شغل فى الورشة الساعة 7 و روحت البيت على ما غيرت و نضفت كانت بقت تمانية كانت ماما جهزت و خرجنا

فى قاعة اسمها صهللة .. كذا دور و كل دور فيه قاعة بإسم شكل

كل ماندخل انا و ماما دور ألاقى فيه عروسة غير منال خالص .. دورت فى التلات ادوار مالقيتشى
قلت هو الفرح اتأجل ولا ايه ؟

نزلت انا و ماما تانى و قلت اتصل بواحدة من زمايلنا اسمها نجوى ..
قلتلها هى فين منال ..؟ قاتلى مش هاجى و اعتذرلها بدالى و كده ..
قلت هو انا مش هالاقيها يعنى ولا ايه ..؟ مش معقول آجى لحد هنا و مالاقيهاش
طلعت تانى و سبت ماما تحت ... بالصدفة قابلت واحدة اسمها مروة كانت معرفة عن طريق منال .. قلتلها فين الفرح قالت فى التالت .. طلعت .. لقيت واحدة شبه منال قلت أكيد هى ...
نزلت جيبت ماما و بعدين أول ما طلعنا دخلت على منال أسلم عليهاو انا لسه شاكك هى ولا لأ ... و طلعت هى

رحبت بيا اوى و الفرحة كانت ها تنط من عينيها لماشافتنى ... سلمت عليها و على العريس و ماماكالعادة سلمت عليها و باستها - مع انها ما تعرفهاش - و بعدين رجعت انا و ماما قعدنا على ترابيزة
انا دلوقتى جوا فرح ماعرفشى فيه حد أبدا ... وكمان مروة ما شفتهاش تانى

يعنى فرح لا اعرف فيه حد ولا حد يعرفنى ..
بس العجيبة و الغريبة - و الله العظيم حصل - لقيت تقريبا ييجى 6 بنات ورا بعض كل واحدة تيجى تقوللى ازيك يا احمد و الف مبروك و بتاع .. و انا و الله العظيم مااعرف ولا واحدة منهم
عرفت من واحدة منهم ان منال بتتكلم عليا كتير ...
اتعرفت عليهم بعد كده .. فاطمة .. و اميرة .. و هبة .. و تقريبا فاطمة تانى ... و الباقيين مش فاكرهم

حضرت افراح كتير قبل كده لقرايبى البنات و الولاد كمان
و فى كل الافراح دى كنت باحس انى على الهامش و مش فى الصورة خالص
... ماليش أى دور و ماحدش مهتم بيا.
إلا الفرح دا ... حسيت إن الكل متهم بيا .. من غير مبالغة و الله

مامتها جت لحد عندى هى و مامة العريس و قالولى الف مبروك و عقبالك و كده ... واحدة من البنات راحت نادت على الاتنين و جابتهم يسلموا عليا
و باباها لما سلمت عليه قاللى انت احمد حمزة زميلها ؟
انا كنت فرحان اوى .. اوى اوى اوى
و الله العظيم كنت فرحان بيها جدا ..

فرحتنى و حسستنى أد إيه انا حلو .. و فى حد فعلا فاكرنى و بيحبنى من غير أى غرض ...
انا كمان بحبها جداااا و الله العظيم وباتمنى ليها كللل خير
لأنها فعلا تستاهل كل خير
سلمت عليها و ماما قالتلى تعالى نقعد بقى شوية
قلتلها اعدى انتى .. انا هاقف شوية ...
فضلت واقف وهى من بعيد بين اللحظة و التانية تبص عليا و تضحك اوىىىىىى
و قعدت تشاورلى و تقوللى " تعالى ... تعالى " ..و انا مكسوف جدا طبعا

ساعتها افتكرت اد ايه احنا كنا قريبين من بعضنا اوى ...
افتكرت كل اللحظات

أول مرة قابلتها ... يوم 18/9/2004 .. السبت .. كانت اول سنة ليها فى الجامعة ... فى اليوم دا كانت لابسة بلوزة بيضة و جيبة زرقا ... و كانت معاها واحدة زميلتها اسمها اميرة جمال .. و كانت لابسة نفس الالوان بردو ..
انا افتكرت الاتنين اخوات او حتى قرايب لكن فكرتى طلعت غلط .. كانوا مجرد زمايل ..
انا فى البداية كنت ميال لأميرة أكتر و كنت واخد عليها أكتر .. و باستظرفها أكتر ..
دلوقتى بيتهيألى لو شفتها فى الجامعة مش هاتعرفنى ولا هاعرفها

افتكرت كمان أيام ماكنا بنتقابل فى الجنينة بتاعة كلية آداب و نفطر سوا .. أنا أبقى مصرّ نفطر همبورجر و شاورمة و هى خايفة على فلوسى و تقوللى ماتخليها طعمية و جبنه .. انت غاوى مصاريف ..؟ ولا معاك قرشين عايز تخلصهم ؟

افتكرت الشلة اللى اتعرفنا عليها فى سنة أول .. شلة تربية رياضية ..
محمد و احمد و ايمن و عمرو .. و افتكرت كمان لما كلمتها عليهم و قلتلها تقطع علاقتها بيهم لانى شوفت أيمن بيتكلم على " جسم " واحدة من البنات زمايلنا أول ما سابتنا مع انه كان كويس جدا معاها

فاكر كمان الشلة اللى اتعرفنا عليها .. نجوى ابراهيم .. عبير عباس .. عبير مغاورى .. هند .. أسماء شبل .. سمر مرسى .. مروة .. عبد الله .. حمادة .. عمرو ..
فاكر يوم ماكنت غايب و جابوا كاميرا و اتصوروا و شوفتها متصورة مع عبد الله فى صورة لوحدهم .. و زعقتلها و قلتلها ازاى .. ماينفعشى .. مايصحش .. و هى أمنت على كل كلامى ..
فاكر جمعية الرسالة للأعمال الخيرية .. اللى عرفت منال عليها و اشتركت معايا فيها و .. و فاكر الرحلتين اللى زرنا فيهم مركز تعليم مجانى للأطفال الأيتام .. مابين 4-6 سنين ..
و لما كنا بنغنى معاهم الاغانى و نوزع عليهم الحلويات و نصاحبهم " و نرجع مبسوطييييييييين اوى باللى عملناه و اننا فرحناهم ..
فاكر يوم ما ركبت انا و هى ميكروباص من عند الصاغة .. و كنا رايحين الجامعة ..
الميكروباص كلن كله حريم ماعدا أنا الراجل الوحيد و كنت قاعد جنب منال . لما واحد راجل جه يركب - كان شيخ - قال إيه دا ..؟ هو كله كريم ؟ ..
رحت رافع إيدى و قايلله انا راجل أهو ياعم .. و ضحكنا أوىىى
فاكر يوم ما أكلتها كشرى لأول مرة عند كشرى التحرير . . و استعجبت لما لقيتها بتحب الشطة جدااااا ..
فاكر أيام ماكنا بنخرج ناكل أيس كريم من عند توبنج .. و هى تقوللى " هاتلى معالق بلاستيك كتير علشان أكمل جهازى " .. طبعا تقصد المعالق البلاستيك بتاعة الايس كريم ..
فاكر لما كانت تقى زعلانة او متضايقة تقوللى " أحمد .. ماتقوللى نكتة " .. أقوللها .. طب إضحكى الأول .. تقوم تضحك أوىىىىى .. و ما أقولشى نكتة .. و مع ذلك تضحك أوىىى
فاكر العيد الصغير اللى فات .. لما اتصلت بيها أقوللها كل سنة و انتى طيبة .. قالتلى فى مفاجئة .. لما أقابلك هاقوللك عليها . و أتارى المفاجئة إنها إتشبكت لمحمد فرحات .. جوزها دلوقتى .. يومها .. كانت جايبالى معاها فى شنطتها ييجى نص طن شيكولاته و بونبونى و أنا خلصت عليهم كلهم . . و يومها كمان طلبت منى هدية شبكتها و جبتلها هاند فرى للموبايل
فاكر يوم 25/1/2005 .. لما اتقابلنا فى الجامعة فى اجازة نص السنة .. و يومها اتخانقت - مع انى مش بتاع خناق خالص - مع واحد غتت قاللى - ماتسيب واحدة - .. هى كانت جاية مع واحدة زميلتها ..
فاكر أيام الحد و الاربع ... اللى كنت باشوفها فيهم دايما ..
فاكر يوم ما عرفتنى لأول مرة على خطيبها الأولانى اللى سابته ... كان إسمه محمد فؤاد .. كنا ماشيين و بعدين فتحت كشكولها .. لقيت جواه صورة محمد فؤاد بتاع الحب الحقيقى .. قلتلها انتى بتحبى محمد فؤاد ..؟ قالتلى بموووت فيه .. دا هو الحب الوحيد اللى فى حياتى .. أنا صدقتها .. و بعدين قالتلى انت عارف انا بحبه ليه ..؟ علشان على إسم خطيبى .. و بعدين ورتنى صورة خطيبها ..
فاكر يوم ما قلنا ها نطلع المكتبة نتثقف شوية .. و كان دخول المكتبة بالكارنيهات .. و انا كنت ما دفعتش المصاريف و مارضيوش يدخلونى و دخلوها هى .. راحت راجعة تاني .. و قالتلى .. يا ندخل سوا يا نخرج سوا ..
فاكر يوم ما ركبنا الميكروباص و احنا راجعين و كان زحمة اوى و كبير اوى .. هى كانت واقفة قدام و انا كنت واقف ورا .. و انا دفعتلها يومها و هى دفعتلى ..
فاكر أجمل أفلام شفتها فى حياتى .. زكى شان و أبو على و واحد من الناس ..
علشان شفتها معاها فى السينما .. صحيح ماحدش عرف عن موضوع السينما دا حاجة . و صحيح كنا لوحدنا .. لكن بجد كنا بنحترم بعض جدا .. جدا جدا جدا
فاكر لما نسيت معاها مفتاح الصيدلية البيطرية أيام ماكنت شغال فيها .. و روحت الصيدلية و جيت أفتح مالقيتش المفاتيح فى جيبى ,.. لولا هى اتصلت بيا و قالتلى مفاتيحك معايا .. و اتقابلنا و خدت منها المفاتيح ...
فاكر لما كنا بناكل آيس كريم و واد صغير شحات بيشحت منى و بيقوللى " يارب تتجوزوا " .. و انا أقولله مخطوبة يابنى .. يقوم ابن اللذين يسهينى و ينتش حتة من بسكوتة الايس كريم
و فاكر اخر يوم قابلتها فيه قبل يوم فرح .. كان يوم الخميس اللى قبله .. لما شربنا عصير قصب .. و احنا بنشرب قالتلى انها كانت خارجة قريب مع محمد -جوزها -و قاللها تعالى نشرب عصير قصب و هى مش رضيت
قلتلها دا كده يبقى شرف ليا إنك ترضى تشربى عصير معايا انا
و أكيد هافضل فاكر الفرح ... اليوم الجميل دا اللى حسستنى فيه فعلا إنى مهم عندها ..

تخيلى كانت بترقص سلو و عمالة تبصلى .. زى ما يكون بتقوللى " انا فرحانة جدا إنك جيتلى النهاردة ..
و أكيد اللى زود فرحتها إنى انا زميلها الولد جيت فى حين إن زمايلها البنات ماجوش
ماقعدتش كتير .. و لما قمت علشان أمشى . كان طبيعى انى اسلم عليها .. شدت على ايدى اوى اوى اوى .. و قالتلى .. و النبى تخليك يا احمد . قلتلها امى ها تنام .. ضحكت و قالتلى خلاص ..
و راحت معلية صوتها أوى - زى ما يكون بتسمع ماما - و قالت بصوت عالى أوىىى .." عقباااااااالك " ..
قلتلها ربنا يخليكى . و سبتها و مشيت ...
بس مشيت و انا فرحان اوى .. بجد إنسانة كويسة اوى .. و محترمة اوى .. و طيبة اوى .. فيها كل الصفات الحلوة و الله ..

يااااااااااااااااااااااارب يهنيها و يسعدها .. و يارب يكون محمد فرحات دا يستحقها فعلا ..

يااااااااااااااااااااااااارب

إهـــداء

إهـــــداء ..

إلى أختى التى لم تلدها أمى ...

و التى لم يسعدنى الزمان بمثلها من قبل ...

و التى لم أرها حتى الآن ..

و الوحيدة التى أسكب عبراتى على كفيها ...

التى ترانى كما لم يرانى أحد من قبل ..

تسمعنى .. تشاركنى .. تحاورنى ..

تهتم بى ..

أحبك كثيرا .....

جدا ...

أكبر عدد من رباعيات صلاح جاهين

اتفضلوا يا جماعة .. جبتلكم النهاردة اكبر عدد من رباعيات صلاح جاهين ممكن تلاقيه فى اى مكان

جمعتهم بالعافية و الله من مواقع كتير اوى

الراجل دا انا باعشقه

اسيبكم بقى مع الرباعيات

------------------------

رباعيات جاهين

الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

علي بعد مليون ميل من أرضنا

من الفراغ الكوني بصيت أنا

لا شفت فرق بين جبال و بحور

و لا شفت فرق ما بين عذاب أو هنا

عجبي !!

إنسان أيا إنسان ما أجهلك

ما أتفهك في الكون و ما أضألك

شمس وقمر و سدوم و ملايين نجوم

و فاكرها يا موهوم مخلوقه لك

عجبي !!

نظرت فوق للنجوم و انا ساير

رجليا عترت في الحفر و الحجاير

بقيت أقول و انا ع التراب: يا سلام

مش بس عبره أخذت لكن عباير

عجبي !!!

- يا نجم .. نورك ليه كده بيرتجف ؟

هو انت قنديل زيت ؟ أو تختلف

- أنا نجم عالي .. بس عالي قوي

و كل ما انظر تحت اخاف انحدف

عجبي !!!!

السم لو كان في الدوا منين يضر ؟

و الموت لو عدونا .. منين يسر؟

حط القلم في الحبر و اكتب كمان

.. و العبد للشهوات .. منين هو حر؟

عجبي

!!!

شاف الطبيب جرحي وصف له الأمل

وعطاني منه مقام يا دوب ما اندمل

مجروح جديد يا طبيب و جرحي لهيب

ودواك فرغ مني .... و إيه العمل

عجبي !!!

أعرف عيون هي الجمال و الحسن

و اعرف عيون تاخد القلوب بالحضن

و عيون مخيفة و قاسية وعيون كتير

وباحس فيهم كلهم بالحزن

عجبي !!

إيش تطلبي يا نفس فوق كل ده

حظك بيضحك و انتي متنكده

ردت قالت لي النفس : قول للبشر

ما يبصوليش بعيون حزينة كده

عجبي !!

إقلع غماك يا تور وارفض تلف

إكسر تروس الساقية و اشتم وتف

قال : بس خطوة كمان .. وخطوة كمان

يا اوصل نهاية السكة يا البير تجف

عجبي !!!

يا حزين يا قمقم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبي !!!!

في يوم صحيت شاعر براحة و صفا

الهم زال و الحزن راح و اختفي

خدني العجب و سألت روحي سؤال

أنا مت ؟ و لا وصلت للفلسفة

عجبي !!!

ورا كل شباك ألف عين مفتوحين

و انا وانتي ماشيين يا غرامي الحزين

لو التصقنا نموت بضربة حجر

و لو افترقنا نموت متحسرين

عجبي !!!

نوح راح لحاله و الطوفان استمر

مركبنا تايهه لسه مش لاقيه بر

آه م الطوفان وآهين يا بر الأمان

إزاي تبان و الدنيا غرقانه شر

عجبي !!

علي رجلي دم .. نظرت له ما احتملت

علي إيدي دم.. سألت ليه ؟ لم وصلت

علي كتفي دم.. و حتي علي رأسي دم

أنا كلي دم .. قتلت ؟ ..... والا اتقتلت

عجبي !!

انا كل يوم أسمع ........ فلان عذبوه

أسرح في بغداد و الجزاير واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!

ينبوع و في الحواديت أنا سمعت عنه

إنه عجيب .. و ف وسط لهاليب لكنه

شقيت كما الفرسان طريقي .. لقيت

حتي الخنازير و الكلاب شربوا منه

عجبي !!!!

يا قرص شمس ما لهش قبة سما

يا ورد من غير أرض شب و نما

يا أي معني جميل سمعنا عليه

الخلق ليه عايشين حياه مؤلمة

عجبي !!!

أحب أعيش ولو في الغابات

أصحي كما ولدتني أمي و ابات

طائر .. حوان.. حشرة .. بشر ..بس أعيش

محلا الحياة.. حتي في هيئة نبات

عجبي !!

سهير ليالي و ياما لفيت و طفت

و ف ليه راجع في الضلام قمت شفت

الخوف ... كأنه كلب سد الطريق

و كنت عاوز أقتله .. بس خفت

عجبي !!

كان فيه زمان سحليه طول فرسخين

كهفين عيونها و خشمها بربخين

ماتت لكين الرعب لم عمره مات

مع إنه فات بدل التاريخ تاريخين

عجبي !!

عجبتني كلمة من كلام الورق

النور شرق من بين حروفها و برق

حبيت أشيلها ف قلبي .. قالت حرام

ده أنا كل قلب دخلت فيه اتحرق

عجبي !!!

رقبه قزازة و قلبي فيها انحشر

شربت كاس و اتنين و خامس عشر

صاحبت ناس م الخمرة ترجع وحوش

و صاحبت ناس م الخمرة ترجع بشر

عجبي !!!!

ليه يا حبيبتي ما بيننا دايما سفر

ده البعد ذنب كبير لا يغتفر

ليه يا حبيبتي ما بيننا دايما بحور

أعدي بحر ألاقي غيره اتحفر

عجبي !!!

خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت و الا الحياه ؟

عجبي !!!

ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!

ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي انا سبتهم

و الا علي الفرص اللي ما سبتهمش

عجبي !!

و الكون ده كيف موجود من غير حدود

و فيه عقارب ليه و تعابين ودود

عالم مجرب فات و قال سلامات

ده ياما فيه سؤالات من غير ردود

عجبي !!!

أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!

يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!

وقفت بين شطين علي قنطــــــــــــــــــرة

الكدب فين و الصدق فيـــــــــــن يا تري

محتار ح اموت .. الحوت خرج لي وقالي

هو الكلام يتقــــــــــــاس بالمســـــــــــطرة

عجبي !!!

سرداب في مستشفي الولاده طويل

صرخات عذاب ورا كل باب وعويل

.. وفي الطــــــريق متزوقين البنات

متزوقـــــــــــــين للحب و المواويل

عجبي !!

الدنيا أوده كـــــــــــبيره للانتظار

فيها ابن أدم زيه زي الحـــــــمار

الهم واحد .. و الملل مشــــــترك

و مفيش حمار بيحاول الانتـــــحار

عجبي !!

أيوب رماه البين بكل العـــــــــلل

سبع سنين مرضان وعنده شلل

الصــــبر طيب .. صبر أيوب شفاه

بس الأكـــــــــاده مات بفعل الملل

عجبي !!!

نسمة ربيع لكن بتكوي الوشـــــــوش

طيور جميلة بس من غير عشـــوش

قلوب بتخفق إنما وحـــــــــــــــــدها

هي الحياه كده .. كلها في الفاشوش

عجبي !!!!

يا طير يا عالي في الســــــما طظ فيك

ما تفتكرشي ربنا مصطــــــــــــــــفيك

برضـــــــــــك بتاكل دود و للطين تعًًًًودً

تمـــــــــص فيه يا حلو .. و يمص فيك

عجبي !!!

كروان جريح مضروب شعاع م القمر

سقط من السموات فؤاده انكســـــــــر

جريت عليه قطه علشان تبلعـــــــــــه

أتاريه خيال شعراء و مالهـــــوش أثر

عجبي !!!

ياللي نصحت الناس بشــــــــــــــرب النبيت

مع بنت حلوه .. وعود , وضحك , وحديت

مش كنت تنصحهم منين يكســــــــــــــــبوا

تمن ده كله ؟ ... و الا يمكن نســـــــــــيت

عجبي !!

ما حد في الدنيا واخد جزاتــــــــــــــــــه

و لا حــــــــــــــــد بيفكر في غير لذاذاته

ما تعرفيش يا حبيبتي .. أنا و انتي مين؟

إنتي عروس النيل ... و أنا النيل بذاته

عجبي !!

رقاصه خرسا و رقصه من غير نغــم

دنيا . . يا مين يصالحها قبل النـــــدم

ساعتين تهز بوجههـــــــــــــــا يعنـي

يترجرجوا نهديها يعني نعـــــــــــــــم

عجبي !!!

إخطفني ياللي تحبني ع الحصان

الدنيا قالت يوم في ماضي الزمان

إخطفني ياللي تحبني ع الـــــفرس

الدنيا قالت .. قام خطفها الشيطان

عجبي !!!!

من بين شقوق الشيش و شقشقت لك

مع شهقة العصافير و زقزقـــــــت لك

نهار جديد انا . . قوم نشوف نعــمليه

انا قلت يا ح تقتلني .. يا ح اقــــــــتلك

عجبي !!!

جالك أوان ووقفت موقف وجـــود

يا تجود بده يا قلبي يا بده تجــــود

ما حد يقدر يبقي علي كل شـــــــئ

مع إن - عجبي - كل شئ موجود

عجبي !!!

جالك اوان وعرفت مشي الجنايــــــــز

كيف شفتها يا عبد رب اللذايــــــــــــذ

قال : شفت شيل بالحيل فقير أو اميـــر

كما شالوا في الخمامير فواضي القزايز

عجبي !!

أنا كنت شئ و صبحت شئ ثم شــئ

شوف ربنا .. قادرعلي كل شـــــــئ

هز الشجر شواشيه ووشوشني قال :

لابد ما يموت شئ عشان يحيا شئ

عجبي !!

يا مشرط الجراح أمانة علـــــــــــيك

و انت ف حشايا تبص من حواليــك

فيه نقطة سوده في قلبي بدأت تبان

شيلها كمان .. و الفضل يرجع إليك

عجبي !!!

كيف شفت قلبي و النبي يا طبيــــــــــــب

همد و مات و الا سامع له دبيـــــــــــــب

قاللي لقيته مختنق بالدمـــــــــــــــــــــوع

و ما لوش دوا غير لمسه من إيد حبيب

عجبي !!!!

تسلم يا غصن الخوخ يا عود الحطـــــــــب

بييجي الربيع .. تطلـــــــــــع زهورك عجب

و انا ليه بيمضـــــــــــي ربيع وييجي ربيع

و لسه برضك قلــــــــــــــــــبي حتة خشب

عجبي !!!

قلبي عليل يا ناس و في الكاس دواه

مديت له إيدي شربت م اللي حــــواه

جنبي الشمال خف .. اليمين اتــــوجع

و إيه يداوي الكبد م اللي كـــــــــــواه

عجبي!!

.. دي مزكرات و كتبتها من ســـــــــنين

في نوتة زرقا لون بحور الحنيــــــــــــن

عترت فيها .. رميتها في المهمـــــــلات

وقلت صحيح أما صحيح كلام مخبولين

عجبي !!

دخل الشتا وقفل البيبان ع البـــيوت

وجعل شعاع الشمس خيط عنكبوت

وحاجات كتير بتموت في ليل الشــتا

لكن حاجات أكتر بترفض تمــــــوت

عجبي !!

- الدنيا من غير الربيع مــــــــيته

ورقة شجر ضعفـــــــانه و مـــفـــــتــته

- لا يا جدع غلطان تأمل وشوف

زهر الشتا طالع فــــــــي عز الشـــــتا

عجبي !!!

ياللي انت بيتك قش مفروش بريش

تقوي عليه الريح .. يصبح ما فيش

عجبي عليك حواليك مخالب كـــــبار

و ما لكش غير منقار و قادر تعيش

عجبي !!!!

سمعت نقطة ميه جوه المحيـــــــط

بتقول لنقطه ما تنزليش في الغويط

أخاف عليكي م الغرق .. قلـــــت أنا

ده اللي يخاف م الوعد يبقي عبيط

عجبي !!!

بحر الحياه مليان بغرقي الحياه

صرخت خش الموج في حلقي ملاه

قارب نجاه .. صرخت قالوا مفيش

غير بس هو الحب قارب نجاه

عجبي !!!

فارس وحيد جوه الدروع الحديد

رفرف عليه عصفور وقال له نشيد

منين .. منين.. و لفين لفين يا جدع

قال من بعيد و لسه رايح بعيد

عجبي !!

كان فيه قمر كأنه فرخ الحمام

علي صغره دق شعاع شق الغمام

أنا كنت حاضر قلت له ينصرك

إشحال لما حتبقي بدر التمام

عجبي !

النهد زي الفهد نط اندلع

قلبي انهبش بين الضلوع و انخلع

ياللي نهيت البنت عن فعلها

قول للطبيعة كمان تبطل دلع

عجبي !!!

صوتك يا بنت الإيه كأنه بدن

يرقص يزيح الهم يمحي الشجن

يا حلوتي و بدنك كأنه كلام

كلام فلاسفه سكروا نسيوا الزمن

عجبي !!!!

كرباج سعاده وقلبي منه اجلد

رمح كأنه حصان و لف البلد

و رجع لي نصل الليل و سألني .. ليه

خجلان تقول انك سعيد يا ولد

عجبي !!!

مزيكة هادية الكون فيها انغـــــمر

وصيف و ليل و عقد فل و سمر

يا هلتري الناس كلهم مبسوطين

و يا هلتري شايفين جمال القمر ؟

عجبي!!

إنشد يا قلبي غنوتك للجمــــــــــــــــــال

و ارقص في صدري من اليمين للشمال

ما هوش بعيد تفضل لبكره سعيــــــــــد

ده كل يوم فيه الف الف احتمـــــــــــــال

عجبي !!

آه لو انا و محبوب جزنا الفضـــــا

في سفينة وحدينا .. واشيا رضـــا

ساعة صفا تعجبنا نرجع لهــــــــــا

و الهم قبل ما ييجي .. يبقي مضـى

عجبي !!

أنا إله الوجد رب الهيــــــــــــــــام

أضرب بسهم الوهم وهم الغـــــرام

و هم الغرام من كتر ما هو لذيـــــذ

رشقت انا ف صدري جميع السهام

عجبي !!!

حدوته عن جعران و عن خنفســــــــــه

اتقابلوا حوا بعض ساعة مســـــــــــــــا

و لا قال لهم حد اختشوا عيب حـــــرام

و لا حد قال دي علاقة متدنســــــــــــــة

عجبي !!!!

ياللي عرفت الحب يوم و انطــــــــــــوي

حسك تقال مشتاق لنبع الهـــــــــــــــوي

حسك تقول مشتاق لنبع الغــــــــــــــــرام

ده الحب .. مين داق منه قطره...ارتوي

عجبي !!!زحام و أبواق سيارات مزعجـــــة

للي يطول له رصيف.. يبقي نجـــا

لو كنت جنبي يا حبيبي أنــــــــــــا

مش كنت أشوف إن الحياة مبهجة

عجبي!!

إيديا في جيوبي وقلبي طــــــــرب

سارح في غربة بس مش مغترب

و حدي لكين ونسان و ماشي كده

وبابتعد ما اعرف .. أو باقـــــترب

عجبي !!

يا ميت ندامه ع القلوب الخـــــــــــلا

لا محبة فيها و لا كراهـــــــــــه ولا

حتي يا قلبي الحزن ما عادش فيـــــك

معلهش .. لك يوم برضه راح تتملا

عجبي !!

مرحب ربيع مرحب ربيع مرحبــــــــــه

يا طفل يا للي ف دمي ناغا وحبــــــــا

علشان عيونك يا صغنن هويــــــــــــت

حتي ديدان الأرض و الأغربــــــــــــــة

عجبي !!!

فتحت شباكي لشمس الصبـــــــــــــــــاح

ما دخلش منه غيــــــــــر عويل الريـــاح

و فتحت قلبي عشان ابوح بالألـــــــــــــم

ما خرجش منه غير محبه و سمــــــــاح

عجبي !!!!

غمست سنك في السواد يا قلـــــــــــــــم

عشان ما تكتب شعر يقطر ألــــــــــــــــم

مالك جرالك إيه يا مجنون ... و ليــــــــه

رسمت ورده وبيت و قلب و علـــــــــــم

عجبي !!!

انا الذي عمري اشتياق في اشتيـــاق

و قطر داخل في محطة الـــــــــفراق

قصدت نبع السم وشربت ســـــــــم

من كتر شوقي وشمي في التريـــاق

عجبي !!!

انا الذي عشت الزمن مضيعـــــــــه

بروح حزينة معفنة مضعضعــــــه

زرعتشجرة سنط لجل انجــــــرح

لقتها شعر البنت و مفرعــــــــــــه

عجبي !!

لو فيه سلام في الأرض وطمان و أمن

لو كان مفيش و لا فقر و لا خوف جبن

لو يملك الانسان مصير كل شـــــــــــئ

انا كنت اجيب للدنيا ميت ألف ابــــــــــن

عجبي !!

العشب طاطا للنسايم و نـــــــــــــــــــــخ

أخضر طري مالهش في الحســـــــن أخ

عصفور عبيط انا .. غاوي بهجه و غنا

ح انزلهنا.. و انشا لله يهبرني فــــــــخ

عجبي !!!

أوصيك يابني بالقمر و الزهـــــــــــــور

أوصيك بليل القاهرة المسحـــــــــــــور

و إن جيت في بالك .. إشتري عقد فل

لأي سمرا.. وقبري إوعك تـــــــــزور

عجبي !!!!

غمض عينيك و ارقص بخفة و دلع

الدنيا هي الشابة و انت الــــــــجدع

تشوف رشاقة خطوتك تعبــــــــدك

لكن انت لو بصيت لرجليك ....تـقع

عجبي !!!

حاسب من الاحزان و حاســـــــب لها

حاسب علي رقابيك من حبلـــــــــــها

راح تنتهي و لابد راح تنتهــــــــــي

مش انتهت أحزان من قبلهــــــــــا؟

عجبي !!!

يأسك و صبرك بين إيديك و انت حر

تيأس ما تيأس الحياه راح تــــــــمر

أنا دقت مندا ومندا عجبي لقيــــــت

الصبر مر و برضك اليـأس مـــــــر

عجبي !!

ولدي نصحتك لما صوتي اتنبــــــــــــح

ما تخفش من جني و لا من شبـــــــــح

و ان هب فيك عفريت قتيل إسألـــــــــه

ما دافعش ليه عن نفسه يوم ما اندبح

عجبي !!

ولدي إليك بدل البالون ميت بالــــــون

انفخ وطرقع فيه علي كل لـــــــــــون

عساك تشوف بعينك مصيرالرجــــــال

المنفوخين في السترة و البنطلـــــون

عجبي !!!

خوض معركتها زي جدك ما خــــاض

صالب و قالب شفتك بامتـــــــــــعاض

هي كده...ما تنولش منها الأمـــــــل

غير بعض صد ورد ووجاع مخاض

عجبي !!!!

كام اشتغلت يا نيل في نحت الصخور

مليون بئونه و الف مليون هاــــتور

يا نيل أنا ابن حلال و من خلفتــــــك

و ليه صعيبه علي بس الأمــــــــور

عجبي !!!

أصحابى

إزيكم يا جماعة النهاردة كنت با العب كورة ... انا بقالى تقريبا سنتين مالعبتش بجد و الله
و مع زمايلى من أيام إعدادى .. اللى واحشيننى جدا و بحبهم جدا جدا ..الجو كان جميل وكنت مبسوط جدا
لكن طبعا تأتى الرياح بما لا تشتهى السفن ..
إتخبطت فى عامود نور و راسى اتعورت و جابت دم كتير ..
أخدونى و غسلوا راسى و جابوا بن و حطوه علشان الجرح يبطل نزيف ..
و أصروا كلهم إنى لازم أتخيط ..طبعا أنا رفضت جدا ..
انا عمرى ما اتخيطت قبل كده .. دا غير إنى خواف جدا.
.أخدونى ور كبونى تاكسى و روحنا مستشفى الجامعة و انا باعارض طول ما احنا ماشيين و متضايق إنهم ها يجبرونى ..
مع إنى حلفت ما اتخيط ..مالقيناش فى مستشفى الجامعة دكاترة علشان يخيطوهالى ..
راحوا جايبين بردو تاكسى و روحنا على المستشفى القديمة ..
و هناك الدكتور قاللى إنه جرح كبير أوى و أخدت 5 غرز ..
لكن على أد ما تعبنى الجرح و الخياطة ..
على أد ما فرحت بأصحابى ..
زمايلى و أخواتى اللى من زمان كنا بنمشى ونروح و نيجى و نعمل كل حاجة مع بعض ..
و مع إننا كل واحد مننا فى كلية شكل و بنبعد عن بعض كتير لكن المسافات ما بعدتشى قلوبنا ..
بحبهم و بيحبونى و هو دا الى يكفينى .
.حسيت فعلا بالأمان ..
و الفرحة ..
ربنا يخليكم كلكم ليا يارب ..
أحمد النحال .. و أحمد مسلم .. و أسامة الشعراوى .. و رامى

عم عبد الواحد

هاحكيلكم نكتوحلوة اوى سمعتها من خالى النهاردة

كان فى مشروع عملاااق اوى .. المفروض انه قرب ينتهى .. و المفروض كمان ان حسنى مبارك ها ييجى يفتتح المشروع دا .. يعنى .. يقص الشريط و كده يعنى

و كان فى فى الموقع بتاع المشروع دا غفير كده غلبان و على اد حاله .. فلاح و بسيط و كده يعنى

كان اسمه عم عبد الواحد

عم عبد الواحد دا لما عرف ان حسنى مبارك جاى يفتتح المشروع .. راح باعت إلتماس للرئيس بيقولله " يا فندم عندى طلب من حضرتك لو حصل ها ترفع من روحى المعنوية انا و اهلى و عيلتى و بلدى كلها .. احنا ناس فقرا و غلابة و مالناش غيرك "

و قالله " باتمنى من سيادتك لما تيجى تفتتح المشروع دا بس تقوللى " إزيك يا عم عبد الواحد " يعنى قدام الصحافة و التليفزيون كده أكيد هاتشرف و الناس هاتعرفنى و يعملوا معايا أحاديث و كده

المهم ... الريس وافق ... جه يوم الافتتاح ...

واقف وسط الحرس و الوزراء و الضباط و الصحافة و المصورين و التليفزيون و الحاجات دى كلها .. و بعد ما قص الشريط .. وقف قالله " إزيك يا عم عبد الواحد "

لقيه مش عايز يرد ... إزيك يا عم عبد الواحد تانى .. بردو عم عبد الواحد مش عايز يرد ... تالت مرة .. إزيك يا عم عبد الواحد .. راح عم عبد الواحد رد عليه قالله " ماخلاص بروح أهلك انت ها تهزر معايا "

صديقتى العزيزة

لى صديقة .. ذكية .. و قوية ... ووفية ..
و متمردة ..
متمردة على كل الأصول و الأعراف ..
عرفتها منذ عامين و خبرتها جيدا ... عرفت إنها لا تبالى بردود الأفعال ..
عينيها تشعان ذكاء غريبا عجيبا يجعلك تتخيل أنها قادرة على سبر أغوارك و كشف أسرارك ..
بها صفة الخبث .. التى امقتها كما أمقت أيضا فيها ولعها بإخفاء الحقائق و طمسها ..
كانت فيما مضى تحب جوارى و تحب حديثى و صداقتى ..
أما الآن فهى تحاول التظاهر بهذا .. و لكن هيهات .. إنها مشاعر لا يمكن تزييفها و خلطها ..
هى أيضا تعرف أنى دائما أحب أن انصحها و أوجهها إذا ما أخطأت - و هى كثيرا ما تخطىء - و لست أنصحها لشىء إلا لأنى أرى فيها ملاكا بريئا ساذجا قاده حظه العاثر فى طريق سيىء ..
لذا .. و لأننى أدركت كم ابتعدت عنى .. آثرت أنا أيضا الإبتعاد و تسطيح الحوار و العلاقة حتى لا أرغمها على ما لا ترغب فيه ..
و صرت أتجنب الحديث فى مشاكلها و اخطائها و تصرفاتها التى أراها دائما - و لى كل الحق - سيئة و خاطئة ..
تعرفت على أخوها .. ووالدها ووالدتها .. بيت جميل .. صغير .. مرتب و نظيف ..
و إناس طيبون .. أخيار .. لا مكر عندهم ولا مواربة .. ولا زيف ولا تزوير ..
إنها ابنتهم وليست منهم ..
و انا أزعم أن حديثى هذا مبالغ فيه .. فأنا أراها أيضا طيبة مثلهم .. و لكنها طيبة يغلب عليها الخبث فيعكرها كما يعكر الحصى سطع البحيرة الرائق ..
تطالعنى ملامحها فى لحظات أتذكر فيها كل كلمة تقولها و أقولها .. كل حركة تقوم بها و أقوم بها ..
زرعت فى قلبى بذرة الشك تجاهها و أنا الذى لا علاقة لى بها سوى الصداقة و الأخوة ..
فكيف بمن سيحبها و تحبه ..
و لقد نمت بذرة الشك حتى أصبحت شجرة كبيرة وارفة ترويها هى فى كل مرة نلتقى فيها بتصرفاتها المريبة ..
قد يبدو الكلام غامضا و لكنها إن قرأته ستفهم .. و ياليتها تفهم ..
أختى العزيزة .. صديقتى الوفية .. و تذكرى أنى حتى الآن أصفك بالوفية ..
تذكرى دائما نصيحتى تلك .. فقد تكون هى النصيحة الأخيرة .
دعى عنك الخبث و اللؤم .. فإنه ليس من شيم الأخيار أمثالك ..
أدعو الله لك بالهداية و السعادة ..
كل السعادة ..

يوم واحد

إنفجر فى داخلى بارود الحزن و الألم و أصاب وهجه الحارق كل خلية فى جسدى و انا أراها تعلننى صراحة أنه حان وقت الفراق ..

صحيح أنه فراق على موعد .. و لكن أنى لى أن اتحمل تلك الفترة التى ستنقضى من عمرى و هى بعيدة عنى

كيف أعيش من دونها و هى تحمل زر تشغيل قلبى فى يدها ..

كيف أتصبر على الفراق ..

تخيلت أيامى السابقة فى بعدها .. و كيف مرت قاتمة .. كئيبة .. محزنة ..

كيف انفصل عنى كيانى و فارقتنى روحى و حاقت بى سبل الفناء من دونها ..

تلاحقت انفاسى و دمعت عيانى و تشتت نظراتى من هول المفاجئة .

لم أكن أعلم أن تلك اللحظة ستأتى ..

عشت فى حلم وردى بنيته فى خيالى .. حلمت بأننا سنظل قرينين قريبين على طول الزمان ..

تخيلتنى أحتويها و تحتوينى .. نندمج و يعاد تشكيلنا فى جسد واحد يحمل روحين ..

ترنحت فى خطواتى .. فقد سلبتنى المفاجأة عزمى و شدتى .. خارت قواى و لم تستطع قدماى ان تحملانى ..
كطفل مرتعد من عقاب أبيه ..

جسلت قليلا و تأملت ذكريات اللقاء الأول .. الخفقة الأولى و الرجفة الأولى ..

الكلمة الأولى و المصافحة الأولى ..

ثم لمست يدى اليمنى .. تلك التى تخيلتها لا تزال تحمل أثر المصافحة الأولى و التى كانت منذ عامين ..

و بحركة تلقائية و جدتنى أرفع يدى و ألثمها بقبلة حملت كل شوقى و حنينى لذكريات اللقاء الأول ..

خاصمنى النوم فى تلك الليلة .. و أرهقنى السهاد .. كيف لا و أنا أتعرض لنفس المعاناة التى طالما
لاحقتنى ..و طالما عايشتها فى ليالى البعاد ..

أتعبنى طول التحديق فى سقف الغرفة التى بدت لى موحشة كئيبة و انا أرانى بعيدا .. بعيدا .. عندها حيث

حلت و حل معها النور ..

مضت الدقائق أياما .. و الساعات شهورا ..

طالت ليلتى و تخيلتها لا تنتهى ..

تذكرت بيتا شعريا يقول ..

كلينى لهم يا اميمة ناصب .. و ليل أقاسيه بطىء الكواكب

أتراه أحس بى و هو ينطق هذا البيت .. أم أنه عانى كما عانيت ...

إستيقظت على نهار جديد يحمل عبق وردود البساتين و رحيق جنات النعيم ..

إرتديت ثيابى على عجل و ركبت حذائى مسرعا .. فأنا على ميعاد هام تتوقف عليه حياتى ..

كيف لا و أنا سأرى روحى التى سلبت منى و عقلى الذى فارقنى

سأقابل نفسى ..

وصلت إلى ميعاد اللقاء و أنا أتحرق شوقا لنظرة من عينى القمر .. ظمآنا لكلمة واحدة ..

و رأيتها ..

ياله من مشهد أبذل كل الجهد لأختزنه فى أعماق نفسى ..

لأجتره حتى إذا ما احتجته فى أوقات الحنين أستعيده بكل زواياه و تفاصيله .. و لكنى لا أستطيع إختزانه ..

و انا معها أحاول الإمساك بتلابيب اللحظات و لا أستطيع .. تفر منى لحظات اللقاء ..

.. لعلها تريد إخبارى كم هى غالية و نفيسة ..

إقتربت منها و شوقى يسيل من عينى كما تسيل الدموع ..

لاحظته هى و سألتنى عنه :

" ما كل هذه اللهفة ... إننا لم نفترق سوى لسويعات قليلة "

ضحكت لقولها .. و عذرتها لأنها لا تدرى ..

لا تردى كم أشتاق إليها و انا معها ..

فكيف و انا بعيد عنها ..

إنها حياتى التى لا عيش بدونها ..

لم أحاول شرح موقفى .. فكفانى أنها معى ..

و ليذهب كل شىء إلى حيث يذهب ... لا أهتم ولا أتساءل..

فقط أحب ...

أحب ..

و بجنون ,

ألقزم .. واقعية .. مؤلمة

شاهدته و للوهلة الأولى خيل إلى أنه طفل ككل الأطفال الذين ينتشرون فى الطرقات و يلهون بكراتهم و عصيهم ..
فلقد رأيت فى يده اليمنى عصا قصيرة ملتوية ما قبل الآخر و كأنها مسند يتكىء عليه و يستند ..
و أيضا لاحظت الجلباب الصغير الذى - حتما - تم تفصيله و خياطته خصيصا لجسده النحيل عديم المثيل ..
قصير ..
قزم ..
احاط وجهه بوشاح أبيض و كأنه يتلاشى نظر الناس إليه و إلى عاهته التى ليس له فيها من ذنب إلا كونه هو صاحبها ..
و عجبت لخطواته .. بدى و كأنه يتزلج على أرض جليدية ناعمة .. يتهادى فى رشاقة .. فى نعومة ..
أو فى خفية .. أيضا من نظرات الشفقة التى تتراشق على طبقة جلده الخارجية لتلذعه كسهام من نار ..
و لاحظت إلتواء طفيف فى كاحل قدمه اليسرى .. بدى و كأنه يبذل جهدا كبيرا لإخفائه حتى لا تتزايد سهام الشفقة فى أعين الناس من حوله و تتفاقم معها آلامه النفسية و المعنوية ..
بدى لى و كأنه يختلس النظرات العابرة فى أعين كل من تصادفه عيناه القصيرتان .. العميقتان .. شعورا منه بأنه محور الكرة الأرضية بخلقته تلك التى بدت له و كأنها ما من مثيل لها بين البشر..
يطوق كتفيه ب " قفطان " دقيق مزركش جميل المنظر .. يختفى خلفة صدره الصفير المتناسق مع جسده ..
كل هذا و أنا أر اه و أستغرق التفكير فى دواخله .. ولا أرى باقى المشهد ..
و هلعت بعد أن إستيقظت عيناى على مشهد أدمى قلبى ..
طفلين صغيرين أخذا يقذفانه بالحصى و هما يريان فيه دمية رائعة ينبغى ألا يضيعا فرصة اللعب معها حتى و إن كان هذا اللعب يرهقها ..
و هو بكل خلايا الحزن التى إعتصرت قلبه يبعدهما عنه فى عناء .. فكفيه المنمنمتان لا تستطيعان الوصول بحال إلى الطفلين الأحمقين ..
كل هذا و هو لا يرى الطفل الثالث الذى جاء من خلفه ليشد " قفطانه " ظنا منه -على أغلب الفروض - بأنه زنبرك اللعبة الذى يحركها لتسعد ثلاثتهم ..
و أحسست بكم هائل من الحزن و الألم على هذا المسكين ..
و أيضا بالغضب الشديد .
احسست بأن أولئك الأطفال أعدائى ..
زجرتهم .. فلم يتعظوا ..أو يتراجعوا ..
ثكلتكم أمهاتكم أيها الخائبون ..
إتجهت إليهم فى سرعة و قدماى تكادا تنغرسا فى الأرض الصلبة من شدة وطء الخطوات ..
إنفصل عنى لبى و غرقت فى بحر الثورة و الهياج ..
ثم .. و بركلة واحدة - لا تسألونى كيف - .. رأيتهم جميعا على الأرض فى مشهد قد يضحكنى فى أحوال أخرى ..
ركلة واحدة جمعت فيها كل غضبى و ثورتى ... أبكتهم جميعا و أرعبتهم .. فجرى كل واحد منهم يختبىء وراء جدار ..
ثم قفزت إلى الرجل أساعده على النهوض بعد أن أوقعه التعساء على الأرض ..
فإذا به يبكى فى حرقة و ألم ما بعده ألم .. إذ يأتى اليوم الذى ينقذه فيه شاب فى سن أبنائه من بطش صبيان فى سن أحفاده ..
ياله من زمن جبار ..
و يالها من أقدار ..
هونت عليه و أنا لا أدرى كيف سأهون انا على نفسى فى المساء على الفراش ..
إبتسم من بين دموعه إبتسامة رأيتها كاذبة و منافقة و لكنى عذرته عليها .. فلو أنى فى مكانه لقتلت نفسى كمدا و حسرة ..
إنصرف و إنصرفت .. و انكسر و انكسرت ..
و بكى و بكيت

أول بوست ليا .. على بركة الله

من زمااااان اوى و انا بازور بلوجات ناس كتير و باقول نفسى يكون عندى بلوج زيهم ..

حاجة حلوة اوى يكون ليك مكان تعبر فيه عن كل حاجة جواك من غير خجل و كمان تنشر إبداعاتك - دا لو كان ينفع نسميها إبداعات - للناس من غير دوشة ولا زحمة ..

عملت محاولات كتيرة جدا ... لكن كلها كانت بتنتهى بسرعة علشان الإهمال

و كمان علشان الوقت

عايز أعرفكم بنفسى طبعا

انا يا جماعة احمد حمزة ..

14/9/1986

المفروض - المفروض - رابعة آداب فرنساوى جامعة الزقازيق ...

لكن أنا فى تالتة و دا أمر ربنا و مش ها نعترض عليه

من الزقازيق .. عاصمة الشرقية ...

والدى عنده ورشة خراطة صغيرة اوى اوى اوى فى شارع الورش و انا الى واقف معاه ... يعنى ممكن تسمونى .. الاسطى احمد

دى طبعا البداية ...

أتمنى اتمنى إنى أكون قادر على المواظبة ... و اتمنى إنى ما اكونشى تقيل على حد

سلاموعليكو