بعــــــــــدا

ضوءالأمانى خافت .. متذبذب لا يستقر ..

و غدى ضباب باهت .. و طريق أحلامى وعر ..

أملى حبيس مخاوفى ..قلبى يساوره الضجر ...

خاصمته عبق الشذى .. و نسيته ضوء القمر ..

مالى تكدست المآسى فوق قلبى كالحجر ..؟

مالى ألملم من دروبى كل إحساس عسر ..؟

كم من غد زينته .. أشلاؤه متمزقة ..

كم من عهود صنتها ... و ظننت أنك صادقة ..

أحلام عمرى خلتها فوق السحاب محلقة ..

فى الأفق بين شموسه ونجومه المتألقة ..

أدركت أن حكايتى مهما فعلت مفارقة ..

أدركت أن مخاوفى مهما هربت محققة ..

عشقى مقة ... ظنى ثقة ..

و سنين عمرى خانقة ..

سافرت بين مدامعى .. عانيت من حملى الثقيل ..

و علمت أنك كنت لى كسحاب صيف لا يطيل ..

آن الأوان لكى أحرر الإحساس من أملى البخيل ..

آن الأوان لكى أقوم و ينهض الجسد الهزيل ..

فقد انطفا ضوء الشموس ...

و قد اختفى خمرالكئوس ..

و تحرر القلب العليل من التشاؤم والعبوس ..

إخترت بعدك قانعا .. و سئمت طأطأة الرؤوس ..

سأقول مهما عارضوا ..

بعدا و بعدا يا ملاك العشق يا أمل النفوس..

رباعيات ... مسحــــــراتى

مسحراتى باصحى نايم ..

و اهز ساكن و ادل هايم ..

نصيرى مالك و مالكه دايم ..

و أمره نافذ .. وحكمه راسى ..

@@@

مسحراتى بادور و أدوّر ..

و فوق دماغى قمر منوّر ..

بامد إيد الأمل و انــوّر ..

طريق هداية لكل عاصى ..

@@@

مسحراتى فى ليلى صاحى ..

لسانى كاتب .. و صمتى ماحى ..

جعلت من حكمتى سلاحى ..

و من حروف الكلام رصاصى ..

@@@

مسحراتى باطوف حاراتى ..

صعب عليا نيلى و فراتى ..

حاكمها خاطى ..

عاليها واطى ..

كبير بينهب .. و شعب ناسى ..

@@@

مسحراتى يا أرض خضرا ..

يامصر فيكى السعادة نادرة ..

شقيت عشانك و بردو ناكرة ..

زرعت قمحك .. سرقتى فاسى ..

@@@

مسحراتى و صبرى صابنى ..

و من شطوط الشروق شطبنى ..

مشتاق لبكرة .. و الشوق غلبنى ..

لصوت مجلجل .. و عقل راسى ..

@@@

مسحراتى باصوم و بادعى ..

و أضم صوتى لصوت برادعى ..

و أقول يا أرض الكنانة إسعى ..

خديلى حقى .. و بوسى راسى ..

@@@

بلدنا بتتــ ..... بينا

النيل بيعطش ليه ..؟

والشمس بردانة ..

والليل ساعاتى ..

والنهار مابيشوفشى ..

مات اللى كان بيقول ان الحياة حلوة ..

عاش اللى كان بيقول ان الشهادة وسام ..

لما القدر يبتلى .. نصبر على البلوى ..

وأوام بنتبطر لو ضحكت الأيام ؟

بنكدب الواقع ..ونصدق الأوهام ..

وفى المسا صاحيين ..

وفى الصباح بننام ..

ليه الأمل يائس ..؟

ليه النهار ضلمة ..؟

سكت اللى كان بيقول ان الكلام نعمة ..

خاف اللى كان بيقول ان الشجاعة سلاح ..

ليه الوطن ظالم .. والمنفى فيه رحمة ..

والموعظة مفسدة .. والمفسدة إصلاح ..

حالنا انقلب ..

والله أعجب مالعجب ..

لون السما غامق أوى ..

من قش رز بيتحرق ..؟

ولا حداد عاللى غرق ..؟

ولا النهار -حتى النهار - فى بلدنا عادى بيتسرق ..؟

خلوها خل ..

وبقينا - غصبن عنا - راضيين بالأقل ..

مابقاش يهم انت اسمك ايه ..؟

أو جنسك ايه ..؟

أو علمك ايه ..؟

بس المهم انت ابن مين ؟

لو ابن واحد مالكبار أكبر لوا تكسر عينيه ..

ولو ابن واحد والسلام يكسر عينيك أهيف أمين ..

الدنيا ماشية بأهلها للخلف در ..

الحلو مر ..

والعار يسر ..

والمصلحة لازم تضر ..

عايز تخلص مصلحة ؟

ابرز تمر ..

واعمل شريف تفضل مكانك .. وانت حر ..

أصل الشريف أصبح سخيف ..

والمفترى أصبح نضيف ..

وانت اللى من أهل البلد ..

أصبحت ضيف

تجربة شخصية

اعزف من الأيام نغم ...
و ابنى من الأحلام هرم ...
احلم و بس ..و اصبر كمان
و اياك تفكر إمتى هايخف الألم ..
و ازاى و ليه و لفين طريقك ينتهى ..
الصبر مش محتاج سؤال ..
و العمر مش محتاج ندم ..
أمسك قلم ..
و ارسم من الصمت اللى ساكن بين ضلوعك أمنية ..
و اياك تلون رسمتك ..
سيب الزمن يرسم رتوش أمنيتك ..
سيب النصيب يرسم ملامح سكتك ..
احلم أوى ..
احلم بجد ..
دا الحلم عمر جديد فى أيامك يمد ..
الحلم طاقة نور فى واقع مستبد ..
و فى وش أمواج الملل ... الحلم سد ..
الحلو جى .. طول مانت قلبك لسه حى ..
بس اصطبر ...
إزاى ها تستطعم و لسه الأكل نى ..؟
أصبر بقى ..
و اتحدى لحظات الشقا ..
و التريقة ..
الحلم عايز شعلقة ...
السكة طالت .. بس بردو العمر طال ..
المستحيل هو المحال ..
خليك شجاع ..
عيش بالأمل ..
و اليأس خليه للعيال ..
لو حتى كان بينك و بين حلمك جبال ..
هد الجبل ..
بين لحظة و التانية ها يتحقق أمل ..
بين نور و ضلمة كل أوبشن محتمل ..
الحلم أكبر من مجرد تجربة ..
أو حتى فكرة ..
الحلم ضحكة شابة حلوة صغيرة ..
و الدنيا عكرة ..
احلم تعيش ..
تلقى الآلام طلعت مافيش ..
احلم تدوق طعم السعادة و الهنا ..
و اسألنى انا ...

ذاتيـــــــــــــة

بقالى كتير باقول كلمة ياريت و اسرح..

و باتخيل سنين عمرى ورود دبلانة بتفتح..

و باتحايل على اللحظة ...

عشان افرح ..

ساعات باضحك على روحى بحلم بعيد ..

و انادى بأعلى صوت فيا و أقول ارجع ..

و نفسى فى مرة لو يسمع ..

بقالى كتير بيتهيألى فى السكة سراب جذاب ..

بيستقبلنى بالترحاب ..

لكن كداب ..

بيوهمنى بأمل بسام ورا الأبواب ..

بقالها كتير معاندانى ..

و باستحمل عشان أوصل لآخرتها ..

لكن فين هى آخرتها ..

مرور الوقت بينسى ...

و عندى مهما مر الوقت عمر الذكرى مانسيتها ..

بقالى كتير بلاقى العضم فى الكرشة ..

و الاقى الهم فى الشارع ..

و فى الأفكار ..

و فى الفرشة ..

يموت جوايا شىء غامض ... و ريحته تفوح ..

و يقتلنى عذاب الروح ..

عذاب الروح مرض مزمن مالوش أعراض ..

لكنه أخطر الأمراض ..

بيحرق كل شىء ممتع ..

ما يبقاش منه إلا رماد ...

رماد فى مدار بيتمرد على سنينه ..

كما مارد مراده يثور على كل اللى ساجنينه ..

بحب اعيش على هوايا ..

و زادى فى غربتى حكاية ..

و بينى و بينى باحكيها ..جواب و سؤال ..

انا الراوى ...

و انا السامع ...

و انا الأبطال ...

امى

أمى ...

دعاؤك مطلبى ..

كم تعصف الأيام بى ..

كم تأكل اللحظات أحلامى ..

و تغلق غيهبى ..

أمى ..

رمانى الحزن فى بحرعميق ..

و القلب بالشكوى يفيض ..

و لقد غدا صوت اللقا صوت خفيض ..

فى غربتى وحدى ذبحت من الوريد إلى الوريد ..

أمى ..

أنا طفل مسن ..

منذ اغتربت و نبض قلبى صامتا دوما يئن ..

لرجوع أيام الصبا روحى تحن ..

أمى انا طفل عجوز حائر ..

بعدته أيام النوى عن كل خدن ..

متغرب عن حقبتى ..

متبرئ من كل سن ..

فى الغربة النكراء أسكن فى سراديب الليالى ألف سجن ..

الحزن سيف يبتر فى حدائق أمنياتى كل غصن ..

و الأمنيات تثاقلت أطرافها ..

و تباطأت خطواتها ..

فى درب أيامى رحلن و لم يعدن ..

و لقد رأيت الحزن أشباحا تحاصر أضلعى من كل ركن ..

صمت القبور يهد أركانى و يسلب ذكرياتى كل لحن ..

و سنين عمرى مثل أوراق الخريف ..

تساقطت من غير إذن ..

أمى ... تعاقبنى السنين ..

و مللت درب الحائرين ..

والنبض فى قلبى .. حزين ..

احتاج منك للمسة تشفينى ..

أحتاج منك لكلمة تهدينى ..

أحتاج منك لدعوة تنجينى ..

ظمأ الغياب ينال من أجزائى ..

و القرب منك - حبيبتى - يروينى ..

حوار مع قلبى

يوما كنت أحدث قلبى ..

كى أقنعه أن يتغير ..

أن لا يسمح فى الترحال بأن يثنيه خيال يظهر ..

أن يتصلب ..

أن يتخشب ..

أن يتحجر ..

أن يتناسى سحر الماضى ..

أن يسمح لحنين الذكرى .. أن يتقهقر ..

قلبى هاج و ماج و زمجر ..

أعلن عصيانا فى وجهى ..

أطرق غضبانا .. و تذمر ..

قال حكاياتى لن تأسر ..

و قصائد عشقى لن تهدر ..

و نقوش الإحساس بأرجائى باقية لن تتأثر ..

قلت تمهل ..

و اعلم أنى لست أثرثر ..

لست أبالغ ..

أو أتعالى ...

أو اتكبر ..

أنظر حولك ...

كيف سترضى ذاك المنظر ..؟

نهر العمر تغير طعمه ..

و بماء الأحزان تعكر ..

يتولى الأصحاب سراعا ..

لم يبق خليل فى دربى ..

وحدى اتندم .. أتحسر

أتجرع غصصى و همومى ..

فى الغربة وحدى .. اتعثر ..

فى روحى بنيان يهوى ..

تزهق أحلامى .. تتكسر ..

العجز الأحمق يقتلنى ..

لا أملك قلما ... او دفتر ..

لا أملك مالا .. أو جاها ..

لا أحمل سيفا .. أو خنجر ..

حسنا يا قلبى .. لا تجزع ..

و اسمع أقوالى .. و تدبر

لا تنظر للخلف حزينا ..

لا تنشد فى واد الأمس سرابا لا يلبث يتبخر ..

انظر للحاضر و القادم ..

كفكف دمعاتك .. و تصبر ...

اسمع سؤلى ثم أجبه ..

و انفض عنك حنين الماضى ..

كيف بغير الماء سيحيا الغصن الأخضر ..؟

ألا تعلمين ..؟

ألا تعلمين ..؟

بأنى وحيد على كل درب ..

و أنى غريب على كل سرب ..

و أنى إذا ما تلاقت جفونى .. فآلام عمر .. و أحزان قلب ..

عشقتك عمرا .. و فجرا .. و حلم

سراج ينور فى كل بهم ..

فإن أخلص الناس فى قنص شعرى ..

ففيك الحماية من كل سهم ..

رأيتك فى الأفق شمس النهار ..

لجين تناثر حول النضار ..

شعاع تعلقت فى طرفه ..

فأغشى عيونى .. بنور و نار ..

شموعى مشاع .. و عمرى خداع ..

و أملى على البعد و لى و ضاع ..

و لكن فى القلب أمل دفين ...

ينادى عليك بصوت حزين ..

ألا تسمعين ..؟؟

فؤادى طريح ..

و جفنى قريح ..

و حلمى كذر غبار بريح ..

فلا أستكين ... ولا أستريح ..

و لكن تعال ِ

أشد إليك رحال الليالى ..

و أبنى صروح الهوى فى خيالى ..

و أنثر شوقى على كل أرض ..

فيشكو عذاب الهوى كل خال ِ ..

تعالى نداوى جراح الفراق ..

و ننفض عنا أسى الإشتياق ..

أعانق فيك هواى القديم ..

و بالرغم منى .. يطول العناق ..

أيا صورة من ضروب الخبال ..

تخاريف ظعن ... و محض لآل ..

إلى كم سأبقى بحلمى مريضا ..

و حتام يبقى الخيال خيال ..

---------------------------------

بهم : ظلام

لجين : فضة

نضار : ذهب

ظعن : سفر

لآل : سراب

أجمل علامة

افتح قوسين ..

و اكتب ما بينهم كلمتين

" أجمل علامة "

و افتح عنيك علشان تشوف الإبتسامة ..

مين اللى قال إن الملايكة فى السما ..

و انتى اللى فوق الأرض أصلا منشئك ..

يا فرحتى المجنونة قلبى بيعشقك ..

يا كدبتى المعجونة وهم .. مصدقك ..

محتار فى وصفك ..

شىء جميل صعب المنال ..

و شعور حقيقى بالسعادة مالوش مثال ..

أنا نفسى تيجى و تسكنى مابين عيونى ...

و أنسى إنك عايشة فيهم ..

و إن يوم جروحى اتألمت .. قربك شافيهم ..

انا نفسى أكتبلك قصيدة ..

توصف الضحكة اللى بتنور بقوة ألف فولت ..

توصف النظرة الى مهتمة بكلامى مهما قلت ..

توصفك ..

توصف جنانك

و انبهار الكل بيكى

توصف السحر اللى فيكى

توصف الطفلة الشقية ..

و الكلام السهل .. لو فيه سم ناقع ..

نفسى أكتبلك قصيدة توفى حقك ..

و اسمها يبقى ..الروائع " " ..

كل يوم الصبح بدرى باقرى إسمك مرة واحدة ..

و اقرى عشقك ألف مرة ..

و افتكر إن اللى بيننا فات و عدى ..

مش باقيلى إلا ذكرى ..

بس بافرح ..

أصلى عارف إنك انتى بردو فاكرة ..

و أمشى أغنى ..

حرف إسمك فى الغنا أصحاب و سهرة ..

و اما باحلم ... بارسمك أحلام لبكرة ..

بس عارف ..

بين شعور الاخوات و بين الحب شعرة ..

أيوة عارف .. بس باتمناكى دايما ..

فيها إيه لو يوم ألاقى واحدة زيك ..

إيه اللى يجرى ..؟

يا نموذج أمنياتى ..

يا حروف الشعر ..

يا فرحة حياتى ..

لما نتكلم بافكر لو يضيع الوقت منى ..

أصلى شايف فيكى ذاتى ..

فيكى شىء غامض آسرنى ..

يمكن البهجة اللى بتنورلى دايما كل سكة ..

يمكن الكلمة اللى بتخلينى أقتل دمعتى دايما بضحكة ..

و أنسى خوفى الوهمى من أصعب خطر ..

دى الشمس بتنور عشان تمحى الظلام ..

وعشان إرادة ربنا .

و عشان تبوس خد القمر ..

أنشودة الندم

سقطت عن الوجه الدميم ستائر الغش الذميم

و هوت على قلبى الضعيف سيوف شيطان رجيم

فى درب عشاق المحال قطعت أميالا .. أهيم

و خدعت بالود الحميم ..

و رجعت بالعشق العقيم ..

فى مهجتى علل الزمان و فى دمى حزن مقيم ..

ياليتنى لم أسطر الأبيات عشقا للهوى ..

و ركنت قسرا للنوى ..

ياليتنى لم أعشق الإحساس فى عينيك أو حتى أره ..

ياليتنى لم أعرف الحرمان أو أتصوره ..

بينى و بينك حاجز ... ياليتنى لم أعبره ..

ياليتنى أبصرت عن بعد نهاية رحلتى فى ضيعتك ..

ياليتنى أبعدت عن عينيك عينى و اتقيت خديعتك ..

ياليته العشق المعتق فى الفؤاد سجنته ..

و لعنته ..

و طعنته ..

ياليتها أذنيك قد صمّت عن الحب الذى أعلنته ..

حسنا .. دعينى أرتجل ..

ذاك العذاب المستقر بداخلى لن يرتحل ..

و الجرح فى عمق الفؤاد مخلد .. لا يندمل ..

ذاك المتيم لن يظل بلا أمل ..

سقط القناع ..

و تقاسمت قلبى السباع ..

أما عن الحلم السخيف ..

فبغير أثمان يباع ..

قد كنت أرحل فى البلاد ..

أروى الغرام بكل واد ..

لا فرق عندى بين خز أو قتاد ..

شيدت من حبى قلاع .. و حملت أشواقى متاع ..

و نظمت أبيات الحنين على الصحائف و الرقاع ..

من مهجتى كان المداد .. من أضلعى كان اليراع ..

ثم انتهى حلم العلا .. آل الحنين إلى وداع ..

ياليتها الأيام حالت بيننا ..

و رحلتِ عن قلبى بأقرب منحنى ..

ماكنت أرحل فى البلاد .. أدور أسأل فى شرود ..

من أنا ..؟

تفاؤل

تقدر تخرج من أحزانك ..؟

تقدر ترجع تانى سعيد ..؟

تقدر تبنى بإيدك حلمك ..

ترسم فرحة فى وش وليد ..

تعشق دايما وقت ما تعشق

تقدر ترمى سهام كيوبيد ..؟

دور على حب ينورلك كل طريق ..

و يدفيك لو وسط جليد ..

دور على إحساس مغزول بخيوط حنيه ..

ييجى يادوب من لمسة إيد ..

مش محتاج يتقال بكلام ..

مش محتاج جوابات و بريد ..

دور فى فلك حلم مالوش آخر ..

لف و لف .. و خليك فاكر

مهما يطول صومك .. جاى عيد ..

حقك تحلم ..

بكرة تطول حلمك بإيديك ..

مهما يكون الحلم بعيد ..

مهما يكون الصبر طويل ..

مهما يكون البخت قليل ..

مهما يكون الحمل تقيل ..

إسمع حكمة ..

إبرة و خيط .. و قميص مقطوع ..

ممكن يرجع زى ماكان لساه مصنوع ..؟؟

أيوة هايرجع ..

مش محتاج غير بس يادوب لمسة فنان ..

يرجع تانى زى ماكان ..

و انت أكيد أعظم فنان .. لون فى الدنيا بألوانك ..

مهما يعلى صوت أحزانك ..

سد ودانك ..

و اوعى تعيش ثابت فى مكانك ..

كل الدنيا طريق مفروش أحلام علشانك ..

خدها نصيحة ..

عيش لو كنت هاتقدر تحلم ..

و ان ماحلمتش يبقى تموت ..

لازم كل عذاب هايفوت ..

يونس عاشها سنين ما يأسشى فى بطن الحوت ..

عدنا من تانى ... اربع سنين

كده يبقى فات أربع سنين ..

و انا لسه باتنفس حنين ..

لحاجات لا يمكن تتنسى ..

أيام ماكنا قريبين ..

أهمس بحب .. و تهمسى ..

كان الكلام اول ما يظهر فوق لسانى ..

بكل ذوق تتحمسى ..

وأفرح بإنك مؤمنة ..

إن اللى غير نظرتك للكون .. أنا

إن اللى دلك عالأمان ..

قاللك هنا ..

أربع سنين فاتت أوام ..

مالحقتش أتكلم و أقول كل الكلام ...

مالحقتش أغزل من خيوطك فرحتى ..

مالحقتش أرسم فوق شفايفك بسمتى ..

آه يا زمان ساخر .. سخيف

آه يا زمان جبار .. مخيف

آه لو تعود أيام زمان ..

أيام ماكان النوم خفيف ..

أيام ماكنا بنفترق تخاطيف ..

أيام ماكنا لقمتين فى رغيف ..

أيام ماكنا صفحتين فى كتاب ..

أيام ماكنا كلمتين فى جواب ..

انا كنت خيط من نور عيونك فى القلوب تاه و اترمى ..

انا كنت فيض من عطر روحك فى الفضا الواسع هما ..

انا كل حاجة فيا كانت مغرمة ..

انا قلبى كان عطشان هوى ..

لكن بسرعة الذكريات فاتت هوا ..

و لقيتنى عايش عاللى فات و سنيننا طارت فى الهوا ..

انا قلبى كان عصفور و عيونك انتى العش ..

العش كان من سعادة و فرح .. مش من قش

سكن هواكى فى روحى .. قش حزنى قش ..

و اما انتهت كل حاجة ... حلم عمرى كش ..

و بقيت وحيد ..

انده على الحلم البعيد .. مالاقى رد ...

وتفوت على القلب الحزين أصعب سنين ..

. وانا لسة فاكر كل شىء

وانا لسه تايه فى الطريق ...

و بنادى بردو ياللى كنتى قريبة ..

ياترى انتى فين ؟

كان ياما كان

كان ياما كان .. كان فيه حجر

فوق تل عالى ينام و يصحى يشوف جمال شمس و قمر ..

ولا عمره فكر فى الى تحت ..

ولا عمره شاف ناس أو شجر ..

عايش لوحده فى مملكه فوق الجميع .. ولا حد قادر يوصله .

لكن فى يوم هجم المطر ..

هبت رياح ..

و اتحرك الحجر اليتيم ..

لقى نفسه فوق المنحدر ..

لا فى ايده يثبت مطرحه ...

ولا حتى يعرف سكته ..

واخده الطريق بين الحفر ...

حفرة يمين ... حفرة شمال ...

و صاحبنا خايف من مصيره المنتظر .

ياترى الرياح واخداه لفين ...

دا سؤال أكيد هاتبان أجابته مع الزمن ...

و الصبر هم تقيل اوى عاللى صبر ..

انا بردو زيك يا حجر ..

عايش تملى على الكفاف ..

ولا حد سامع شكوتى ..

ولا حد شاف ..

ولا عمرى بافرد طولى أكتر م اللحاف ..

بارسم حياتى يوم بيوم ..

و تملى فارد ضهرى لزكيبة الهموم ..

بس الزمن صعبان عليه أفضل كده ...

لازم لكل طريق .. ندا

خدنى فى طريق من أوله مليان حفر ..

القصد .. يعنى بالمفيد المخصر ..

اتغيرت كل المعانى و الصور جوا العيون ..

مابقيتشى عارف فين انا ..

ولا مين أكون ..

العمر عدى ..

و الورد ندّى ..

بس فجر الحلم هدى ..

و انكوت فيا الجروح ..

روح يا زمان .. و تعالى بيا و روح ..

غير ظروف ..

بدد سراب ..

بدل طموح ..

جدد آمال ..

حقق خيال ..

الضلمة فوق الروح جبال ..

و النور حقيقة .. و احتمال ..

انا أصلى اتعودت خلاص ..

اتعودت خلاص عالغربة ..

اتعودت انى ابقى وحيد ..

اتعودت أبص لنفسى بإحساس غيرى و اشوفنى جميل ..

و افرح بيا ..

و احكى معايا ..

و اسمع صوت الشوق جوايا لكل بعيد ..

و اتمنى الأمنية الغالية ..

ارجع تانى طفل صغير ..لسه وليد

ســـــلام

مغلــــــــــــــــــــــــــــــــــــــــــــــق

.

لعــــــــــــــــــــــــــــــــــــــــــــــدم

.

التفـــــــــــــــــــــــــــــــــــــــــــرغ

.

مش ممكن كمية الضحك دى

مش متعود أجيب فيديوهات من يوتيوب هنا و اعرضها لكن فعلا سمير غانم فى المشهد دا لا يقاوم .. بس اتفرجوا على المشهد للآخر و احكموا

حكمة اليوم ... و كل يوم

مش كل الحلو .. محبوب .
و مش كل الوحش .. مكروه ..
و مش كل حاجة قريبة .. ممكنة ..
و مش كل حاجة بعيدة .. مستحيلة ...
بس

عمرو سليم .. و غزة .. ضحك على واقع مؤلم

غزة ... آه يا غزة

كنت كاتب القصيدة دى من سنة تقريبا ... لكن فى الوضع الحالى و مع كل اللى قريته و شفته و سمعته .. مالقيتشى أكتر من إنى أكتبها هنا ... تعبيرا عن كل الحاجات اللى جوايا .. و جوا ناس تانية كتير أوى ..

-------------

آه يا غزة ..
دمعتك تحت الحصار فى القلب حازّة ..
كسرتك بين العرب هزتنى هزّة ..
أصل العرب فى الشجب و التنديد أساتذة ..
فيهم أمير سارح فى بار مع أحلى مزة ..
فيهم سفيه بيشد بانجو فى قلب غرزة ..
تاه الطريق بيهم .. و ضايعين فى السكك ..
كل واحد فى اتجاه ..
اللى عام جنب الطيور ..
و اللى طار جنب السمك ..
إصحوا .. فوقوا ..
عدموا شعب و لسه غيره كتير أوى ..
النعجة مهما تتحلب ..
جاى يوم و ها تتشوى ..
صوتنا طالع .. بس لازمه يكون قوى ..
لازمه يوصل للى فوق ..
اللى ماسكين الساطور .
إصحوا .. لازم يوم نثور ..
ثورة تمحى الضلمة .. و تبدلها نور ..
مش بكنس الأوليا .. أو بدخان البخور ..
بس بالكلمة القوية .. و الثبات ساعة المبارزة ..
شوفوا غزة ..
إدرسوها فى الكتب زى التلامذة ..
غزة محتاجة المعونة ..
ولا قدروا يلجموكم بالمعونة ..؟
إسمعونا ..
و افهمونا ..
ساعدوا غزة و أهل غزة .. و ارحمونا ..
حولوا حلم الصمود و النصر واقع ..
بيعوا خوفكم بالإرادة ..
و اخرجوا بره القواقع
سيبكو من كلمة أندد أو أعارض..
كونوا فرسان فى المواقع ..
دافعوا عن شرف العروبة فى المعارك ..
صدروا روح الصمود من غير جمارك ..
تحت أصوات المدافع ..
بس فين هى المواجهة ..
الشباب صابغين شعورهم أحمريكا ..
و البنات عاملينلى فيها أفروديت ..
علمونا إزاى نركز فى التفاهة ..
و اللى ييجى يقول " تحاربوا "؟..
نقول " عبيط "
وضعنا بالشكل دا غير محتمل ..
إصحوا
قوموا ..
قبل ما تزيد العلل ..
خلصونا من عذاب موت الضمير ..
المخطط لسه فاضل فيه كتير ..
كل واحد جايله دور ..
كله واقف فى الطابور ..
مهما يغلى الشاى لابد فى يوم يفور ..

إصحوا .. قوموا ..
قبل ما الدايرة على النايمين تدور ..
قبل ما تقوم القيامة
و نلاقينا عريانين يوم النشور ..
و الكريم يسألنا .. مانلاقيش جواب ..
خافوا من يوم الحساب ..
الشجاعة بابها واحد ..
و الهروب له ألف باب ..
غيتوا غزة .. قبل ما تشوفوا العذاب ..
و نلاقينا مرة واحدة .. مطرودين زى الكلاب ..
بره بيتنا ..
طال كلامى .. بس إيه الفايدة لو طال الكلام ..
بعد ما يموت الضمير ..
خلوا بالكم ..
خطة النار و الدمار من بدرى جاهزة ..
مشغولين بيها الجهابذة ..
بس علشان تفسدوها ..
ياللا فوقوا ..
كلنا نرجع لروحنا ..
و نفدى غزة

أنا و السحاب

سحاب سابح بيتسحب .. لكن حابساه سما زرقا ..
.
بابص لفوق يفكرنى بنار البعد و الفرقة ..
.
مانا زيه .. باروح و آجى ..
.
حسب تقديرى و مزاجى ..
.
لكن صخر الحياة قاسى ..
.
تملى يصد أمواجى ..
.
لكن عايش ..
.
باصبر نفسى بالاحلام .. و لو حتى على الهامش ..
.
و أحلامى فى بحر غويط سمك سباح محال صيده ..
..
باقول يارب صبرنى .. و قدرنى ..
..
و إيه يشفع لعبد ضعيف إذا مارضيش عليه سيده ..؟
.
سحاب سابح بيسحبنى ..

و يحبسنى فى حسبة كام سنة فاتت ..
.
و يبكى معايا عالعمر اللى ضاع منى و انا ساكت ..
.

كلمتين .. و بس

.

.

تسوى إيه كلمة محبة .. لو مافيش حد استمع ..؟

.

يبقى حب فى قلب واحد .. زاد على القلبين وجع ..

.

بس بردو الحب نعمة .. حتى لو من غير أمل ..

.

مهما قرص النحل يوجع .. بردو بنحب العسل ..

.