فاصل ... و نعود

معلش ..

إمتحانات بقى و بتاع .....

و لنــــــا لقـــــــــــاء

سلامو عليكو

التاج التاج التاج التاج .. موعودة ياللى عليكى التاج

العزيزة - خالص مالص - توتا ... صاحبة مدوتة يوميات فتاة محتارة باعتالى تاج ..

شوفتوا الهنا اللى انا فيه ..؟

و بما إنى مش من أهل التاج .. أول تاج يوصلنى من ساعة ما فتحت مدونتى المتواضعة دى اللى عمرها لحد دلوقتى سنة و شهرين

و بما إنى كمان مش باعرف أرد كويس على الأسئلة اللى من النوع دا ..

بتحب إيه و بتكره إيه و بتعمل إيه و هاتلبس إيه و هاتغسل إيه ..

إذن ... قررت أجرب ..

و يا إما أدعيلها ..

يا إما أدعى عليها ..

إذن ... لنبدأ ..

--------------

لو اعطيتك 3 وردات من هم ال3 اشخاص الي هتديهم الورده؟

بصى يا ستى ..

مش بالضرورة - زى ما انتى مجاوبة فى البلوج عندك - إن كل الحاجات المهمة تتعلق بأهلى و بابا و ماما و اخواتى ..

طبيعى دول ليهم مكانة خاصة ..

لكن خلينا نتكلم من جوانا شوية ..

الناس الغاليين عليا بالفعل ..

من جوا جوا يعنى ..

أحمد أتون - سمر - منال

سمر - أحمد أتون - منال

منال - سمر - أحمد أتون

أنا كتبتهم بالطريقة دى علشان تكونوا عارفين إن مافيش ترتيب ..

ماحدش قبل التانى ولا بعده ..

بس

***

لو اعطيتك ورقه فيها 3 سطور تكتب الي انت عايزه تكتب ايه؟

هو كله تلاتات تلاتات ولا إيه ..؟

ما علينا

السطر الأولانى و التانى فاضيين ..

و فى السطر التالت هاكتب " الحمد لله .. إحنا أحسن من غيرنا " .... بس

***

ماهو هدفك فى الحياة ؟

الصراحة هى أهداف مش هدف واحد

لكن أهمهم ... و أصعبهم - دلوقتى على الأقل - هو الإستقرار ..

الإستقرار بكل ما تحمله الكلمة من معنى بقى .. تقدرى تقولى الشغل .. الشهادة .. الإرتباط .. الإلتزام .. كل حاجة ممكن تخلى البنى آدم مرتاح فى حياته نقدر نحطها تحت بند الإستقرار ..

***

ان شاء الله بكره هيكون احسن من النهارده؟هل تصدق هذه العباره؟

بصراحة لأ ..

و لست بعلام الغيوب و إنما ... أرى بلحاظ الرأى ماهو واقع ..

عايز أقولك إن كانت من أمنياتى أعيش فى زمن غير الزمن دا ..

بالتحديد أيام أوائل التمانينات ..

و ماتسأليش ليه

***

اجمل مقوله سمعتها في حياتك ايه؟

طبعا بعد كل آيه و كل حديث شريف .. اللى بيفوقوا أعظم كلام اتقال فى أى زمان و مكان

لكن احنا بنقول مقولة قالها بشرى ..

بنى آدم يعنى زى حالاتنا كده ..

ممكن أقولك ... كوبليه فى أغنية عمرو دياب ..

الشمس طالعة فى كل يوم .. هو كده طبع الحياة

***

من المغني الي بتحبه اوي واحلي اغنيه ليه ايه؟

محمد قنديل ...محمد فوزى ... أم كلثوم ...

و اجمل الأغانى .. عوام .. تملى فى قلبى .. لفوزى

حلاوة زمان .. ماشى كلامك .. حدوته .. الصبح بدرى .. محمد قنديل

فكرونى .. ومرت الأيام .. انت الحب .. الحب كله .. أمل حياتى .. يا مسهرنى .. .. أم كلثوم

***

غزه تمثل ايه في حياتك؟

هو مش فى حياتى يعنى لكن فى تفكيرى .. فى إدراكى ..

غزة تمثل الذل .. الظلم .. المعاناة .

التغفيل .. التقصير .. التآمر ..

كل المعانى اللى فاتت دى .. و أكتر منها ..

بس فين القلم اللى يعبر

***

اعطي لانتمائك لوطنك درجه بالمئه؟

122 %

***

لو تزوجت وانجبت بنتين وولدين اسمهم هيكون ايه؟

البنتين : منال ... و أمنية

الولدين .. : ناصر .. و على

بس قولى يارب

***

عمرك غشيت في امتحان وانت صغير؟

و انا صغير عمرها ما حصلت .. لأنى كنت نابغة بكل ما تحمله الكلمة من معانى .. بجد و الله من غير أى مبالغة ..حتى أسألوا أبلة عيشة بتاعة الرسم

شوية شوية كبرت و فى اعدادى كنت انا و احمد حسين جارى - الله يمسيه بالخير - شطار جدا بردو .. و كنا دايما نعمل دويتو مع بعض فى الامتحانات .. خصوصا إن أحمد محمد حمزة و أحمد محمد حسين حرفيا قريبين أوى من بعض لذلك كان دايما يبقى قاعد ورايا .. أو قدامى .. لذلك كنا بنجاوب إجابات جماعية نموذجية ..

فى ثانوى اتفرقنا و بعد ما اتفرقنا ابتديت أتعلم الغش .. مش هاقول إنى ندمان على كده .. لأن الأحوال هى اللى بتجبر البنى آدم على كده ..

أما فى الجامعة بقى .. أنا قاعد من دلوقتى باجهز أهو البرشام بتاع مادة الأدب .. هامتحنها يوم الحد الجاى .. بس إدعولى بقى ..

و الله باسهر طول الليل أجهز البرشام .. على الورق و على الموبايل .. أصل موبايلى 6233 بيقبل ملفات مكتوبة من الكمبيوتر ..

شفتوا باتعب إزاى ..؟

أيوة امال إيه .. لازم نتعب فى البرشام علشان ربنا يراضينا

***

قول 3 صفات ب3 كلمات اوصف بيهم شخصيتي؟

طبيعى أوى و على سجيتى ..

واقعى جدااااا

غلبان لدرجة لا يمكن وصفها

***

لو مرتبك كان كتير يكفي اجيب اغلي هديه اجيب لكل فرد في عيلتك ايه؟

هاجيب لأمى و أبويا جواز سفر علشان يطلعوا الحج .. التذاكر عليهم طبعا ..

أخويا الكبير هاجيبله شبشب علشان قرفنى كل شوية يلبس بتاعى و لما أقوله هاتلك شبشب يقوللى مش فاضى أنزل أشترى واحد

هاجيب للصغير إزازة برفان علشان بيحب البرفان أوى مع إنه لسه فى رابعة إبتدائى ..

هاجيب لأختى كرتونة بمبرز علشان البت سلمى بنتها زهقتها .. عاملة زى الحنفية اللى عايزة جلدة ..

و هاجيب لسيد جوز أختى موبايل حديد صب علشان مهما يقع منه أو يتهبد ما يجرالوش حاجة ..

و هاجيب لعمى "خرطوشة " سجاير علشان حريقة بجد .. هو الوحيد فى العيلة اللى بيشرب سجاير .. و كل شوية يقوللى هابطلها ..

و هاجيب لخالى علبه طباشير طبى علشان مدرس

انا شكلى كده مش هاخلص ..

المهم هاجيب لكل واحد اللى هو محتاجله ..

و من غير تبذير

***

برده بكلمه واحده ايه الصفه الي عايزها في شريك حياتي؟

الوفاء .. بس

***

ايه المجال الي غير دراستك وشايف نفسي فيه اوي حتي لو كان الرسم علي الحيطه؟

خراطة المعادن .. علشان دى أصلا مهنتى و مستقبلى ..

و كمان الأدب العربى .. انا أساسا كنت قسم لغة عربية .. لكن منهم لله بقى اللى حولونى غصب عنى

***

بتحب السفر؟
جدااااااااااااااااااااااااااااااااا .. مافيش حاجة باستمتع بيها أد السفر و " الصياعة " فى أرض الله الواسعة

***
طب دلوقتي حالا ايه المكان الي نفسك تكون فيه ؟

البدرشين .. جيزة ..

عند خالى

حبيب قلبى ..

بس لو يفضالى

بحس إننا توأم .. مش واحد و ابن اخته

***

تمرر التاج ده لمين؟

أسماء ... تيجى زى ما تيجى ..

سمر pure like a rose

مى .. قصاقيص مشاعر ...

سومة .. و يامين يقوللى الصح فين و الغلط ..

و انا و انت ....

و سمعنى أحلى سلام

***

اخر سؤال ده الصراحه جامد جدا؟بس صعب جدا؟
اذكر 10 اشياء عن نفسك؟؟؟؟؟؟

1- عفريت

2- خجول جدا

3- كريم موووت و اللى فى جيبى مش ليا

4- باعشق الذكريات

5- رومانسى طحن .. من غير بحبك و باعبدك و هات بوسة و الكلام الفاضى دا .. لكن برزانة .. بجد

6- بيصعب عليا أى حد بسهولة

7- سريع الملل

8- إهتماماتى عشوائية

9- ساعات بيبقى ماليش كلمة

10- مواعيدى مظبوطة جداااااا

***

اختار اشخاص اهدي لهم التاج؟

كل بنى آدم دخل البلوج بتاعى و قرا التاج دا

------------------------

مش عارف بقى فى النهاية أدعى ليك و أدعى عليكى يا توتا ..

بس مبدئيا هادعى عليكى .. علشان إيديا اللى تعبتنى من كتر الكتابة دى ..

سلام

سيدتى

سيدتى ..

قد تقرأين قصيدتى ..

قد تبصرين بها نهاية قصتى ..

قد تعلمين اليوم أنى مستقيل .

.مادام لى فى القلب أكثر من بديل ..

فأنا دخيل ..

و انا احاذر أن أكون أنا الدخيل .

.فاليوم أعلن توبتى عن كل إحساس جميل ..

أنوى الرحيل ..

لابد لى أن أنسحب ..

هذا - بحق - ما يجب ..

و كفاك - يا ذات العيون الساحرات - من اللعب

.يكفيك أنى كنت عندك خير شاعر ..

يكفيك إحساسى الذى أخفيته من دون ساتر ..

يكفيك جرحى باللقا .. و الجرح غائر .

.ماتت بقايا الكبرياء ..

و سلاسل الدمعات فوق الوجنتين ..

كخيوط نار من عدم ..تبغى البقاء ..

قلبى يخاصمه الضياء ..

لا تعزفى لحن التضرع و الخجل ..

كم من جبان يرتدى ثوب البطل ..

يا دوحة العشق الكبير..

..كم دمعة لك فى الضمير

..الوقت حان لتسمعى بيتى الأخير

..الجرذ جرذ دائما

..حتى و إن عشق الزأير

فى حب نهال

القول قولى و اللسان لسانى ..

فى العشق دوما أرفض الكتمان .

.فى العشق دوما تستحيل قصائدى ..

كنزا من الألفاظ و الأوزان ..

و "نهال" .. عشقك فى فؤادى راسخ ..

لا تعتريه وساوس البهتان ..

قلبى بقربك يستكين و موضعى ..

" كفر الشاويش" مبارك الجدران ..

فى القرب قلبى تستريح جروحه ..

و سنين عمرى فى اللقاء ثوانى ..

أنشأت ديوان الجمال بضيعتى ..

كانت "نهال" رئيسة الديوان ..

بسماتها فى ضوء نجمات السما ..

همساتها فى رقة الكروان ..

يا حلوتى أنت البراءة كلها ..

أسرت فؤادى روعة العينان ..

يا عقلة الأصبع .. تعالى ها هنا ..

أهديك من شعرى و من ألحانى ..

قصص الهوى دوما تضيع و تنمحى ..

أن طاف فيها طائف النسيان ..

الحب يخبو .. و المشاعر تنطفى ..

إلاك يا فيض الهوى المنان .

.عشرون عاما قد مضت يا حلوتى ..

و القلب عندك يعشق الهذيان ..

قد ضاق قلبى بالتفرق و النوى

..ملّت سنينى لوعة الحرمان

..يا قصة العشق التى أدمنتها

..لا تسلبينى لذة الإدمان ..

حــــــــزن

أحصد غيطان الحزن يا مسكين ...

تهرب من الأحزان تروح على فين ؟

الحزن مكتوبلك تعيش وياه ..

و إن مت ها يصاحبك ليوم الدين ..

***

الدنيا دى صندوق فى قلبه تروس ..

بتلف و بتطحن معاها نفوس ..

الناس بتاكل بعضها كده ليه ..؟

و الرحمة فى قلوبهم واكلها السوس ..

***

أنا قلبى متعود على الأخطار ..

و مشيت طريق الحزن بالمشوار ..

موزونة فيا الفرحة بالجرامات ..

والحزن موزون فيا بالقنطار ..

***

ماعرفشى ليه باكتب عن الأحزان ..

يمكن عشان تايه بغير شطآن

..مش لاقى فى الدنيا دى شىء اهواه

..واللى أكرهه موجود فى كل مكان

***

أنا .. و بابا .. و الحاجة الساقعة

أحداث هذه القصة واقعية تماما ...و الفاصل بين كل مشهدين هو 24 ساعة فقط لا غير

المشــــهد الأول

***

أنا و بابا و أيمن اللى شغال معانا فى الورشة ..

المكان .. الورشة ..

الزمان .. العصرية كده ..

***

بابا : حلوة أوى الكفتة اللى جبتها دى يا أحمد .. روح هاتلنا إتنين حاجة ساقعة بقى علشان نهضم

أنا أتوجه لمحل " بيسو بتاع الكشرى " و أحضر زجاجتين ( سفن أب ) صاروخ ..

و اعود مرة أخرى للورشة ..

أنا : إتفضل يا اسطى محمد ... اتفضل يا اسطى أيمن

بابا : يا احمد بلاش تجيبلنا سفن أب دى تانى انا زهقت منها .. ابقى غير المرة الجاية مش كل مرة يعنى سفن أب ..

أنا : حاضر يا سيدى .. المرة الجاية أجيبلك غيرها ..

****

المشـــهد الثانى

***

أنا و بابا

المكان .. البيت

الزمان .. بعد نص الليل

أنا عائد لتوى من الخارج حيث أقضى السهرة دائما مع أصدقائى

بابا : قبل ما تغير

هدومك و النبى ياحمد روح هاتلى إزازة حاجة ساقعة لاحسن لسه متعشى و عايز " أبلّع "

.. أنا : حاضر يا سيدى .. عايزها إيه ..

بابا : اللى تجيبه ياعم أحمد انا مش بادق ...

أنا أتوجه لأقرب سوبر ماركت و أحضر زجاجة " بيبسى " صاروخ أيضا .. ثم أعود للمنزل و أعطيها للحاج ..

بابا : يا ابنى انت مش لاقى غير البتاعة المقرفة دى اللى تجيبها ..؟ دى طعمها وحش أوى ..

انا : خلاص هات أرجعهالك إحنا لسه مش فتحناها ..

بابا : خلاص خلاص ياعم انت هاتفضل رايح جاى ..؟ هاشربها بقى و أمرى لله ..

****

المشـــهد الثالث

***

أنا و بابا

المكان .. الورشة

الزمان .. المغربية كده ..

أيمن روح النهاردة بدرى علشان رايح يكشف على مراته

علشان حامل

..بابا : ماتروح تجيبلنا ازازتين حاجة ساقعة انا و انت يا احمد كده تطرى على قلبنا .. انا ريقى ناشف

..أنا : ماشى يا سيدى .. هات الفلوس .. عايزها إيه بقىىىىىىىى

بابا " بمنتهى الود " : اللى هاتشرب منه هاشرب منه ياعم أحمد ..

انا : لأ و النبى قوللى عايزها إيه علشان ماترجعشى تانى تقولى مش عايزها

..بابا " بتهريج " :عم أحمد اللى انت تجيبه أنا مش هاقوللك عليه لأ

..أنا : يعنى عايزها إيه ياعم الحاج و النبى الله يخليك ...

بابا : ماخلاص يابنى انا مش ناقصك بقى .. روح هات أى حاجة مش تعمللى فيلم ..

أنا أتوجه لمحل " بيسو بتاع الكشرى " و أحضر زجاجتين ( ميرندا ) صاروخ أيضا .. و أعود للورشة ...

أنا : إتفضل ياسطى محمد .. حلو كده ..؟

بابا : إيه دا ..؟ يابنى دانا مش باكره اد البرتقان ..

أنا " ألطم " : يعنى أخترعلك مشروب خصوصى يعنى ولا إيه بقىىىىىىىى ..؟

****

بابا ..

أبوس إيديك ..

إرحمــــــــــــــــــــــنى

كلمات .. من واقع يوم اليتيم

حسنا .. لأواجه نفسى بالحقيقة إذن من دون مواربة ولا طمس ..
إنها فى النهاية تبقى الحقيقة مهما حاولت تجاهلها أو تناسيها ..
ثم إنها لا تحمل تلك القتامة التى تجعلنى أهابها أو أخفيها ..
إنها الحقيقة ولا شىء غيرها ..
لم يشغلنى أبدا أن أقبع فى ذلك الجانب المظلم وحيدا أتقافز و أتقافز لأنال و لو جزء من أجزاء من دفة الحديث .. و الإهتمام ..
لم تكن تشغلنى كل تلك المحاولات اليائسة .. البائسة .. لنيل شىء من الأسماع و الأبصار ..
لقد كان يجدر بى أن أتخلى عن ذلك المرح المصطنع ..
و تلك الضحكات المزيفة ..
كان يجدر بى أن أوفر كل تلك الدعابات التى هى " ضحك للضحك " ..
لماذا أحرص دوما – و أفشل دوما أيضا – على الظهور فى منتصف الصورة .. و ليس فى جانبها كما قد يفضل الكثيرون .. ؟ل
ماذا أبذل كل ذلك المجهود للإستحواذ على اهتمام أشخاص ربما لا تقع عينى عليهم مرة أخرى ..؟
و لكن دعونى أنظر للنصف الملآن من الكوب ..
دعونى أتقبل الصورة كما هى ..
و بقليل من الخيال .. و كثير من النسيان .. يمكنها أن تصبح من أكثر صور عمرى روعة و جمال ..
لقد كان يكفينى ذلك المرح الطبيعى .. الواقعى .. بينى و بين أطفال تعرفت عليهم لأول مرة هناك ..
لعبنا .. و جرينا .. و أكلنا .. و تحادثنا .. و تمازحنا .. وتناقشنا .. ثم تفرقنا ..
كان يكفينى كل ذلك الود الذى تقابلت عليه مع عمرو و محمد الأخوين الفاضلين المهذبين – جدا - .. و كأنها صداقة عمر تلك التى تجمعنا .. و لكنها راحة القلوب للقلوب .
. أتذكر هنا إعجابى بمناديل محمد " مودى " أخو إنجى و نور ..
و قيادته المتمرسة لسيارات التصادم ..
أتذكر تهذيب عمرو و محمد – للمرة الثانية – و إنصاتهما الهادىء لكلماتى الضالة .. التى تنشد الحكمة ..
أتذكر تعجبى من قدرتى الخارقة على تذكر أسماء الأطفال .. كل بأسمه .. و كأنى أعرفهم قبل أن يولدوا ..
فهناك حسين .. و أحمد .. و محمد .. و ابراهيم .. ثم أحمد .. و احمد مرة أخرى .. و فرج .. وعادل .. و فتحى – الذى أخذ منى جنيه سلف .. لا اعرف كيف - .. و انتهاء بهيثم .. يتيم الأب و الأم ..
أتذكر فقرة الساحر المدهشة التى تابعتها لأول مرة فى حياتى بكل شغف الدنيا – فليمتنع الجميع عن الضحك – تابعتها كما لو كنت طفلا من الأطفال ..
أتذكر فرحتى بتجمع الأطفال من حولى و نداءهم لى ب " أستاذ أحمد " تلك التى لم أسمعها فى حياتى .. توقفوا عن الضحك .. أرجوكم .. بالتأكيد انا لا يمكننى أن أتذكر كل ما مررت به .. أو مر بى ..
ولكنه فى النهاية يوم يحمل علامة " إستثنائى " ..
لم تكن تجربتى الأولى فى ذلك المضمار ... و لكنها بالتأكيد الأفضل و الأجمل بين قريناتها ..
فكرت كثيرا فى النهاية أن أحذف تلك السطور فى المقدمة .. فهى تفسد الجو النفسى للمقال ككل ..
و لكنى فضلت إبقاءها .. فهى تحمل الحقيقة .. كل الحقيقة ..
تحمل حقيقة شاب أصابته عقدة التملك و حب الذات بلوثة أفقدته عقله .. و أفسدت عليه لحظات سعادته .. و ياليته يجد العلاج