كراكيب

محبوس فى جوفك كام سؤال ..؟
الصبر طال ..
والبخت مال ..
و العمر ضاع من غير جدال ..
دوّر عليك ..
هاتلاقى نفسك لسه مسجون فى الخيال ..
هاتلاقى حلمك شىء محال ..
هاتلاقى نفسك باكى و فى نفس المكان ..
و الهم جوا القلب ماينعد ..
المساحة ضيقة .. و الهوا عالأد ..
الطرق متعشقة .. و الحوارى سد ..
و هانعمل إيه ..؟
ماهو جيلنا من بين البشر مكتوب عليه ..
يحزن كتير .. يفرح قليل ..
يحلم فى يوم يتهنى بالعشق الجميل ..
ينده على الحلم البعيد ..
لكن يقرب .. مستحيل ..
ينسج أمانى بالسراب .. أيوة السراب ...
ماهو بردو أحسن من مافيش ..
و فى لحظة يصحى عالحقيقة المؤلمة ..
كل الأمانى بقت خراب ..
كل الأمانى ماتساويش ..
نفسك فى يوم توصل لشىء ..؟
روح موت عشان تقدر تعيش ..
و الحل إيه ..؟
منديل ورق .. غرقان عرق ..
بيشد فى خناق الزهق ..
و ساعات تعب ما بتنتهيش ..
و ياريت يفيد كل الألم ..
عشان تعيش من غير هموم ..حاول تعيش زى الصنم ..
إنسى اللى جاى و انسى اللى فات ..
إنسى الصور و الذكريات ..
قضى سنينك من سكات ..
و كأن قلبك - رغم نبضه العالى - مات ..