حكاية عصفور

عصفور و قابل عصفورة ..

و اتمنى يظهر فى الصورة ..

جواه مشاعر مكبوتة ..

هايم فى عشق السنيورة ..

***

عصفور فقير .. غلبان .. محتاج ..

راكب سفينة فوق الأمواج ..

كان نفسه يوصف إحساسه ..

و يلاقى للكتمان دا علاج ..

***

كان من زمان محتاج يفرح ..

و يلاقى فى الأيام مطرح ..

يعشق و يحلم زى الناس ..

و يقوم بدور فوق المسرح ..

***

صارح حبيبته بشعوره ..

مسكين مايعرفشى مصيره ..

مغشوش ياعينى بعشق محال ..

فاكر مافيش عصفور غيره..

***

بينه و بينها قفص ضيق ..

و بيبان قديمة بتزيق ..

و طريق طويل مالهوش آخر ..

عقبات كتير صعبة .. تزهق..

***

ماتفوق بقى يا طويل الريش ..

سيبك من الاحساس دا و عيش ..

الحلم صعب عليك .. و بعيد ..

تحلم كتير .. و تلاقى مافيش ..

***