تجربة شخصية

اعزف من الأيام نغم ...
و ابنى من الأحلام هرم ...
احلم و بس ..و اصبر كمان
و اياك تفكر إمتى هايخف الألم ..
و ازاى و ليه و لفين طريقك ينتهى ..
الصبر مش محتاج سؤال ..
و العمر مش محتاج ندم ..
أمسك قلم ..
و ارسم من الصمت اللى ساكن بين ضلوعك أمنية ..
و اياك تلون رسمتك ..
سيب الزمن يرسم رتوش أمنيتك ..
سيب النصيب يرسم ملامح سكتك ..
احلم أوى ..
احلم بجد ..
دا الحلم عمر جديد فى أيامك يمد ..
الحلم طاقة نور فى واقع مستبد ..
و فى وش أمواج الملل ... الحلم سد ..
الحلو جى .. طول مانت قلبك لسه حى ..
بس اصطبر ...
إزاى ها تستطعم و لسه الأكل نى ..؟
أصبر بقى ..
و اتحدى لحظات الشقا ..
و التريقة ..
الحلم عايز شعلقة ...
السكة طالت .. بس بردو العمر طال ..
المستحيل هو المحال ..
خليك شجاع ..
عيش بالأمل ..
و اليأس خليه للعيال ..
لو حتى كان بينك و بين حلمك جبال ..
هد الجبل ..
بين لحظة و التانية ها يتحقق أمل ..
بين نور و ضلمة كل أوبشن محتمل ..
الحلم أكبر من مجرد تجربة ..
أو حتى فكرة ..
الحلم ضحكة شابة حلوة صغيرة ..
و الدنيا عكرة ..
احلم تعيش ..
تلقى الآلام طلعت مافيش ..
احلم تدوق طعم السعادة و الهنا ..
و اسألنى انا ...

ذاتيـــــــــــــة

بقالى كتير باقول كلمة ياريت و اسرح..

و باتخيل سنين عمرى ورود دبلانة بتفتح..

و باتحايل على اللحظة ...

عشان افرح ..

ساعات باضحك على روحى بحلم بعيد ..

و انادى بأعلى صوت فيا و أقول ارجع ..

و نفسى فى مرة لو يسمع ..

بقالى كتير بيتهيألى فى السكة سراب جذاب ..

بيستقبلنى بالترحاب ..

لكن كداب ..

بيوهمنى بأمل بسام ورا الأبواب ..

بقالها كتير معاندانى ..

و باستحمل عشان أوصل لآخرتها ..

لكن فين هى آخرتها ..

مرور الوقت بينسى ...

و عندى مهما مر الوقت عمر الذكرى مانسيتها ..

بقالى كتير بلاقى العضم فى الكرشة ..

و الاقى الهم فى الشارع ..

و فى الأفكار ..

و فى الفرشة ..

يموت جوايا شىء غامض ... و ريحته تفوح ..

و يقتلنى عذاب الروح ..

عذاب الروح مرض مزمن مالوش أعراض ..

لكنه أخطر الأمراض ..

بيحرق كل شىء ممتع ..

ما يبقاش منه إلا رماد ...

رماد فى مدار بيتمرد على سنينه ..

كما مارد مراده يثور على كل اللى ساجنينه ..

بحب اعيش على هوايا ..

و زادى فى غربتى حكاية ..

و بينى و بينى باحكيها ..جواب و سؤال ..

انا الراوى ...

و انا السامع ...

و انا الأبطال ...