أحمد الهوان كان عندنا إمبارح.. و ياريته ماجه

السلام عليكم و رحمة الله و بركاته

إمبارح .. بمناسبة إحتفالات نصر أكتوبر - لسه فاكرين هه ؟ - كانوا مستضيفين البطل أحمد الهوان "جمعة الشوان " فى ندوة مفتوحة عندنا فى كلية الآداب جامعة الزقازيق

خلينى أحكيلكم الأول اللى حصل علشان تعرفوا أد إيه إحنا متخلفين

صحيت الصبح روحت فتحت الورشة و كنستها و غسلت المخرطة و استنيت لما والدى جه و بعدين سيبته و قلتله انا رايح الجامعة ..

نزلت الجامعة أحضر محاضرة حضارة فرنسية للدكتورة فريدة النجدى

المحاضرة بدات عادى جدا و احنا مندمجين اوى مع الدكتورة .. مع إننا مش فاهمين حاجة

المهم لقيت الباب بيخبط و الفراش داخل و بيوشوش الدكتورة فى ودنها .. انا قلت خير ها يلغوا المحاضرة و نروح بقى

الفراش طلع .. الدكتورة قالت يا جماعة بعد إذنكم إحنا عندنا ضيف فى الجامعة النهاردة و عايزين حد يحضرله ندوته و مش لاقيين حد .. فلو سمحتم تحضروا معلش علشان مانكسفش حد ... انا قلت مستضيفين مين يعنى ..؟

جه فى بالى كل أسامى الفناني المشاهير .. بس مش معقولة لو مستضيفين فنا أو حتى لعيب كورة .. مش معقولة مش هايلاقوا حد يحضرله .. سألت اللى جنيى مين .. قال ما اعرفشى .. كل اللى قاعدين قالوا مانعرفش .. واحد بس من ورا قال جمعة الشوان ..

و الله ما تعرفوا انا فرحت أد إيه و عايز أقولكم كمان إن جسمى قشعر من الفرحة . معقولة هاشوف البطل دا فعلا بشحمه ولحمه ..؟ انا قريت عنه كتير اوى بس ماكنتش أتخيل أبدا إنى أشوفه فى يوم من الأيام

و استغربت إزى يعنى مش لاقيين حد يحضر ندوته .. دا راجل بطل و الناس كلها شافت المسلسل ... مفروض كلهم يحبوا يشوفوه .. بس الظاهر إنى كنت بافكر غلط

المهم خرجنا من قاعة المحاضرة - مش عايز أقولكم بالعافية - و طلعنا على المدرج اللى فيه أحود الهوان . فى نفس الدور .. قعدت فى تالت بنش علشان أعرف أشوفه كويس ... و بدأت الوفود

و الظاهر إن كلهم بردو كانوا جايين بالإجبار ...

و احنا قاعدين .. بنت فى البنش اللى قدامى سألتنى .. هو مين اللى جاى .. قلتلها أحمد الهوان . قالتلى أحمد الهاون مين دا يعنى بيبيع إيه .؟ .. قلتلها شوفتى مسلسل جمعة الشوان " لو قلتلها دموع فى عيون وقحة أكيد مش هاتعرفه " قالتلى أيوة ... قلتلها أهو هو دا .. قالتلى يعنى عادل إمام جاى ..؟ كنت هافط فى كرشها .. قلتلها لأ .. دا بقى جمعة الشوان الحقيقى ... بس إسمه احمد الهوان ..

و بنت على شمالى سألت نفس السؤال... مين اللى جاى .. قلتلها شوفتى مسلسل جمعة الشوان ..؟ قالتلى لأ ... قلت خلاص .. قومى إمشى

و دخل البطل

و للصراحة بالنسبة للتسقيف الناس كلنت كريمة اوى معاه .. تسقيف و تصفير كل خمس دقايق تقريبا

و الله جسمى تلج أول ما شوفته ..

وزعوا علينا ورق صغير علشان كل واحد يكتب فيه أسئلة ... بس المشكلة إنهم وزعوا الورق من غير ما يلموه تانى ..

بس الفضايح بدأت تبان

الميكروفون كل خمس ثوانى يعطل .. و الراجل صوته يتقطع فى وسط الكلام و مانسمعشى منه حاجة

الطلبة اللى دخلت و شافت أحمد الهوان .. زهقوا .. مع إن ما بقالهمشى عشر دقايق .. كل ما الباب يتفتح .. تلاقى ييجى تلتميت طالب قاموا و عايزين يخرجوا و يمشوا .. و الأمن يرجعهم تانى ... بالعافية

على يمينى كان فيه طالب زعلان أوى علشان دا كله و كل شوية يصرخ و يقول يا شعب جاهل .. يا متخلفين .. أان الصراحة خفت منه

للحظ الزفت موبايلى ماكانشى معايا .. سايبه فى الضمان من يوم الحد اللى فات علشان بيتصلح

لو كان معايا كنت غرقت أحمد الهوان تصوير

البطل أحمد الهوان مواليد 1939 ... عنده 68 سنة يعنى

قال إن مسلسل دموع فى عيون وقحة ماقدمشى أكتر من 6 فى المية من الحقيقة

جهاز كشف الكذب اللى ظهر فى المسلسل دا ماهو إلا كرسى حلاق .. و لما سألناه عن شكله الحقيقى .. مارضيش يوصفه لكن قال إنه حاجة مرعبة

قال إنه حب " جوجو " فعلا و كان عايز يتجوزها

قال إنه كان يتمنى إن اللى يقوم بدوره فى المسلسل واحد من اتنين ...

فريد شوقى أو محمود مرسى

و لما سألنا ليه ..؟ قام و قف ... و قال أنا عادل إمام بيجيلى تحت كتفى بعشرين سنتى .. يعنى مفروض الناس كانت تعرف أبعاد جسمى بردو

و لما سألناه عن علاقته بعادل إمام و عن الخلافات اللى كانت بينهم

حكى قصة .. ...

كانوا فى يوم - من خمس سنين تقريبا - فى فندق .. و كان فى تجمع كبير اوى من الفنانين .. عادى إمام سأله . إنت بتشتغل إيه دلوقتى يا احمد .. قالله انا عندى محلات سوبر ماركت .. و عندى شركتين بترول .. و شركة سياحة ..

رد عادل إمام .. "أنا كسبت من كل حلقة من المسلسل أد اللى انت بتكسبه من الشركات دى ميت مرة " .. شفتوا الوقاحة ..؟

و لما دخل البطل .. الناس سلموا عليه .. و قالوا جمعة الشوان جه . عادل إمام قال " لأ .. دا احمد الهوان .. انا جمعة الشوان " منتهى البجاحة و قلة الأدب .. مفروض إنك تشكر الراجل دا على الأقل علشان هو كان سبب كبير فى صعودك من القاع للقمة بالمسلسل اللى جسدت فيه شخصيته

قال كمان إنه تم الكشف عن شخصيته سنة 1977

و قال إنه ماتلقاش أى تهديدات بالقتل من الموساد أو من غيره لحد دلوقتى

و قال إنه تلقى من الموساد ما يعادل 17 مليون دولار فى 11 سنة اتعامل فيها معاهم و خدعهم فيها

و بعد الكشف عنه انتحر 6 ضباط كبار فى الموساد

بعد ما انتهت الندوة .. الطلاب هجموا عليه . كل واحد عايز توقيع .. و اللى عايز صورة .. بس انا اكتفيت إنى قربت منه و سلمت عليه بإيدى

كان يوم جميل ...

ماعتقدشى إنه ها يتكرر تانى ..